Koko, anto amɔtshi ndekaka nsawola l’angɛnyi awɔ lo nkamba la dihomɔ sɔ. Anto asɔ koka ndjonga l’ekakatanu wayela ɛnɛ . . .

• hawoyolekaka mbidja yimba lo nsaki y’angɛnyi awɔ.

• ndjoyaokaka opoko wamboleka ndo ekalema.

• vɔ ndjolekaka mbika washo lo wahɔ awɔ lo dihole dia mbidja yimba lo wahɔ w’angɛnyi awɔ.

EYA NSAKI Y’ANTO AKINA

Dia nshihodia nsaki y’onto okina, sho pombaka mbɔsa etena ka nkana yimba la solo dia lotutsha tshɛ lo dikambo diande. Koko dui sɔ koka monga wolo naka tekɔ lo ndjasha tshɛ lo fundanɛ ndo lo tomanɛ mesajɛ lo rɛzo sɔsio.

Naka tshulatshula mbaya owandji ayɛ, kete olimu ayɛ ayonga paka wa kadimolaka lo mesajɛ. Oyango ayɛ ayonga paka wa dimolaka mesajɛ lo dihole dia nkimanyiya ɔngɛnyi ayɛ ɔmɔtshi wele lo dihombo.

DIMBOLA DIA NKANA LA DIƆ YIMBA: Etena katomɛyɛ angɛnyi ayɛ mesajɛ, “ngande wakokayɛ mɛnya dia wɛ ndjakiyanyaka” lo dikambo diawɔ?​—1 PETERO 3:8.

NAKA WƐ OYAOKA OPOKO

Eyangelo ɛmɔtshi wakasalema wakɛnya di’anto efula wayasha lo rɛszo sɔsio hawotoyaokaka dimɛna l’ɔkɔngɔ wa vɔ mbetsha etena k’otale lɔkɔ. Eyangelo akɔ komiyaka lo mbuta dia wendelo wa foto ndo kɛnɛ kasala onto okina koka nkonya anto dia vɔ “ndjaoka diele oko wekɔ lo mbetsha wenya wetshetsha ndo ndooko kasalawɔ ka dikayi.”

Ndo nto, menda foto y’amɛna yadja anto akina, koka tokonya dia sho ndjoyaɛdika lo yoho ya kɔlɔ l’anto akina. Laadiko a laasɔ, dui sɔ mbeyaka ndjɛnya dia onto tshɛ aketshaki tena di’ɔngɛnɔngɛnɔ, etena kele lɔsɛnɔ layɛ halotshikitana.

DIMBOLA DIA NKANA LA DIƆ YIMBA: Etena kakambayɛ la rɛzo sɔsio, ngande wakokayɛ mbewɔ dia ndjaɛdika lo yoho ya kɔlɔ l’anto akina?​—NGALATIYA 6:4.

NDJASHA LE YƐ AMBOLEKA

Dibuku dimɔtshi * mbutaka ɔnɛ: Ombetsha ɔmɔtshi akɛnyi di’ambeki ande amɔtshi wakalangaka paka angɛnyi wasala akambo paka lo wahɔ awɔ oto. Lɔngɛnyi la ngasɔ koka ndjokokonya dia wɛ ndjosala dui dimɔ diahayakombola nsala. Onto la ngasɔ koka ndjotatɛ mbɔsa angɛnyi ande oko aplikasiɔ wa telefɔnɛ wakokande kambaka lawɔ etena kende l’ohomba ndo wakokande mbadima etena kende bu l’ohomba awɔ.

DIMBOLA DIA NKANA LA DIƆ YIMBA: Onde foto yadjayɛ l’Ɛtɛrnɛtɛ mbeyaka ndjokokonya dia wɛ monga la tokanyi ta shɛmanedi kana ta ndeka ndjasha paka leyɛ wɛmɛ?​—NGALATIYA 5:26.

SƐDINGOLA WOHO WAKAMBAYƐ LA TSHULATSHULA

Naka telefɔnɛ kana tablɛtɛ monga okambi ayɛ lo dihole dia monga owandji ayɛ, kete tɔ kayokokimanyiya dia wɛ sawolaka l’angɛnyi ayɛ ndo nkeketsha lɔngɛnyi lasayɛ la wɔ.

Sɔna alako wayoyolanga nkamba lawɔ kana mfunda tokanyi tayɛ hita.

• Hemba dia sawolaka l’anto (lo dihole dia tomanɛka tsho mesajɛ)

• Nya telefɔnɛ oma laleyɛ (kana djatɔ l’adidimu) etena kasawolayɛ l’anto akina

• Kitshakitsha wenya walekayɛ mbetsha dia mendaka foto yadja anto akina lo rɛzo sɔsio

• Onga ompokami wa dimɛna

• Sawola l’ɔngɛnyi ayɛ latenyanya tena dia wolo