Jich yuʼun bayal ya xtuun te tecnología, pero te machʼatik jaʼnax ya stuuntesik yuʼun ya skʼopon-a te yamigotak ya xjuʼ ya staik te wokoliletik ini:

• Ma xyichʼix ta wenta te yamigotak.

• Stukel ya yaʼiy sbaik.

• Jaʼnax ya yichʼ sbaik ta mukʼ.

ICHʼAW TA WENTA

Yuʼun ya jnaʼtik bin yaʼiyel ya yaʼiy sba te yantik ya skʼan ya kichʼtik ta wenta. Pero teme jaʼnax baem koʼtantik ta skʼoponel te bintik ay ta Internet sok te ya kakʼtik bael mensajeetik, ma jnaʼtik te bin yaʼiyel ya yaʼiy sbaike.

Teme jaʼ ya xbajt ta awoʼtan ta stuuntesel te tecnología aʼteltik sba ya awilix te sujtesbeyel smensaje te awamigotake sok maniwan ya xjuʼix awuʼun skoltayel te awamigo te yak ta kʼaxel ta wokol.

NOPA TA SWENTA INI: ¿Bin-utʼil ya awakʼ ta ilel te ya awichʼ ta wenta te awamigotak te kʼalal ya atuuntes te tecnología? (1 PEDRO 3:8).

JTUKEL YA KAʼIY JBATIK

Ay machʼa la sta ta ilel te bayal ants winiketik ma lek la yaʼiy sbaik yuʼun te kʼalal la skʼasesik bayal tiempo ta yilel te Internet. Te machʼatik ya yilbeyik skʼoplal la yalik te machʼatik ya yilik te fotoetik sok te bin ya yalik ta swenta te bin spasoj te yantik, «ya xjuʼ te jich ya kaʼiy jbatik te maʼyuk bin mukʼ skʼoplal jpasojtik».

Jaʼnix jich te kʼalal ya kiltik te fotoetik ya smoesik te machʼatik ay bin ya spasik, ya xjuʼ te ya xjajch jpaj jbatik sok te ya jnoptik te ya yaʼiybey sbujtsʼ te bin ya spasik, pero te joʼotik ya xjuʼ ya jkuytik te maʼyuk swentail te jkuxlejaltik.

NOPA TA SWENTA INI: ¿Bin yuʼun ma skʼan ya apaj aba sok yantik te kʼalal ya atuuntes te Internet? (GÁLATAS 6:4).

YA YAKʼ JTOY JBATIK

Jtul maestra la yal te chaʼoxtul jnop junetik jaʼnax ya yichʼ sbaik ta mukʼ sok ya sle yamigotak «yuʼun-nax ay bin ya xpasbot ta stojolik». * Jaʼ yuʼun ayniwan machʼa ya xjajch yil te yamigotak jich bitʼil jun aplicación te ya xjuʼ ya sjam sok ya smak te bin-ora ya skʼane.

NOPA TA SWENTA INI: ¿Yabal yakʼ ta ilel te bin ya amoes ta Internet te ya amulan tsaltamba sok te ya atoy aba? (GÁLATAS 5:26).

TSAJTAYA ABA TE KʼALAL YA ATUUNTES TE TECNOLOGÍA

Teme jaʼat ya atsajtay te bin-utʼil ya atuuntes te tecnología sok te ma jaʼuk ya stuuntesat, jich ya xjuʼ ya xkʼopojat sok te awamigotak sok yak atulanubtes te bitʼil awamigoinej aba soke.

Tsʼibaya te bin ya akʼan ya apas o tsʼibaya te bin ya xjuʼ ya apasxane:

• Te ma jaʼuknax ya jkʼopon ta mensaje o ta correo te kamigotak.

• Te yakuk jtupʼbey skʼop te jcelular kʼalal ay machʼa yakon ta skʼoponel.

• Te ma bayaluk tiempo ya x-ochon ta Internet.

• Te yakuk jchʼam kaʼiy te bin ya yal te yantik.

• Te yakuk jkʼopon jtul kamigo te yak ta kʼaxel ta wokol.