Pe li buchʼutik jaʼ mas tstunesik li selular, tavleta o komputadora sventa skʼopon yamigotakike xuʼ van snuptan svokolik kʼuchaʼal liʼe:

• Mu xa stsak ta venta ti kʼu yelan chaʼi sba yamigotakike.

• Muʼyuk kʼanbil chaʼiik.

• Mas tsots skʼoplal chaʼi sba stukik. 

TI KʼU YELAN CHAʼI SBAE

Sventa jnaʼtik kʼu yelan chaʼi sba li yantike, skʼan jnoptik ti kʼu yelan oyik ta melele. Pe taje mu spas kuʼuntik mi jaʼ noʼox batem ta koʼontontik skʼelel kʼusitik ta redes sociales o ta stakel mensajeetike. 

Mi jaʼ xa mas chbat ta koʼontontik skʼelel jselulartik, jtavletatik o jkomputadoratike, jaʼ xa me mu masuk tsots skʼoplal chkiltik li kʼusi ta jtakʼbetik li kamigotaktike, yuʼun anil xa ta jtakʼbetik li smensajeike xchiʼuk muʼyuk xa ta jnoptik li kʼusi yakal tsnuptanike.

NOPO TA SVENTA LIʼE: Kʼalal chakʼopon avamigotak ta selular o ta yan kʼusie, ¿kʼuxi chavakʼ ta ilel ti chatsak ta venta ti kʼu yelan chaʼi sbaike? (1 PEDRO 3:8). 

MUʼYUK KʼANBIL CHAʼIIK 

Junantik sientifikoetike laj yakʼik venta ti ep buchʼutik chopol laj yaʼi sbaik kʼalal oy kʼusitik la skʼelik ta jun red social ti lek ojtikinbile. ¿Kʼu yuʼun ti jech laj yaʼi sbaike? Li sientifikoetike chalik ti muʼyuk la kʼusi labal sba chkaʼi jpasoj ta jkuxlejaltik kʼalal ta jkʼelbetik sfotoik o li kʼusitik chalik yantik li ta redes socialese.

Maʼuk noʼox taje, yuʼun kʼalal ta xkilbetik li sfotoik ti labal sba kʼusitik tspasike, xuʼ van ta jnoptik ti yakal tskʼupin li xkuxlejalike, pe li voʼotik une muʼyuk. 

NOPO TA SVENTA LIʼE: Kʼalal chakʼel li kʼusitik tsmuyes yantik li ta redes socialese, ¿kʼusi skʼan xapas sventa mu xakoʼoltas aba xchiʼukike? (GALATAS 6:4). 

TSOTS SKʼOPLAL CHAʼIIK

Jun maestrae laj yal ti ep yajchanuntake jaʼ xa noʼox tspasik li kʼusi lek chaʼi stukike xchiʼuk jaʼ noʼox chamigoinik li buchʼutik lek snaʼ xkoltavanik chilike. * Yuʼun li kʼusi mas tsots skʼoplal chaʼiike jaʼ ti xichʼik koltaele. Li buchʼu jech tspase xkoʼolaj xa ta jun aplikasion chil yamigotak ti jaʼ noʼox tsjam kʼalal chtun yuʼune. 

NOPO TA SVENTA LIʼE: Li kʼusi chamuyes ta Internete, ¿mi chakʼ ta ilel ti jaʼ noʼox oy ta avoʼonton chatsalvane o ti jaʼ mas tsots akʼoplal chavaʼi abae? (GALATAS 5:26). 

NOPO KʼU YELAN CHATUNES LI ASELULAR O YAN KʼUSIE 

Mi ta spʼisol noʼox chatunes li aselular, atavleta o akomputadorae, jtunel avuʼun sventa xakʼopon avamigotak xchiʼuk ti masuk to lek xavil aba xchiʼukike. 

Akʼbo senyail li kʼusi chakʼan chapase o tsʼibao mi oy kʼusi yan chakʼan chapase: 

• Kʼalal ta jkʼopon li kamigotake, ta jkʼan te jchiʼukik maʼuk noʼox ta mensaje o ta korreo elektroniko.

• Nom bu chkakʼ jtelefono o chkakʼ ta silencio kʼalal oy buchʼu ta jchiʼin ta loʼile.

• Mu xa masuk chi-och li ta redes socialese.

• Ta jkʼan ta jtsʼet chikinta li kʼusi chalbeikune.

• Ta jkʼopon batel junuk kamigo ti oy kʼusi yakal tsnuptane.