Pero may mga tawo nga teknolohiya an nangunguna nga paagi ha pakigkomunikar ha ira kasangkayan, salit . . .

• naiibanan an ira empatiya ha ira kasangkayan.

• mas naabat hira nga nag-uusahan ngan masurub-on.

• mas nagpupokus hira ha ira kalugaringon kay ha iba.

EMPATIYA

Basi maipakita an empatiya, kinahanglan maghatag kita hin panahon nga hunahunaon an usa nga tawo. Makuri ito himoon kon busy kita ha pagbasa o pagpadara hin mga text ngan pagkinita ha mga post ha social media.

Kon ginkukontrol ka na han teknolohiya, bangin hunahunaon mo nga pabug-at an pagbaton ha mga message han imo kasangkayan. Karuyag mo nga basta mabaton na la an tanan nga message, ngan diri mo na napapansin nga nanginginahanglan hin bulig an usa han imo kasangkayan.

HUNAHUNAA INI: Paonan-o mo maipapakita an “simpatiya” kon nagamit ka hin teknolohiya ha pakigkomunikar ha imo kasangkayan?​—1 PEDRO 3:8.

PAGIN MASURUB-ON

Nahibaroan ha usa nga survey nga damu an nagigin mas masurub-on katapos magkinita ha mga post ha social media. Nakasiring an mga researcher nga kon an usa nagkikinita ha mga piktyur ngan update han iba, puydi hiya “umabat nga waray hiya nahimo nga mapulsanon.”

Dugang pa, an pagkinita ha eksayting nga mga piktyur nga igin-post han iba mahimo magresulta hin negatibo nga pagkompara. Bangin hunahunaon mo nga an ngatanan nag-i-enjoy pero ikaw diri.

HUNAHUNAA INI: Kon nagamit hin social media, paonan-o mo malilikayan an negatibo nga pagkompara han imo kalugaringon ha iba?​—GALACIA 6:4.

PAGPOKUS HA KALUGARINGON

Usa nga titser an nagsiring nga an pipira han iya mga estudyante makikalugaringon, ngan an ginpipili la nira nga mga sangkay adton may mahihimo para ha ira. * An sugad nga pakigsangkay nakapokus la ha kon ano an makukuha han usa. Mahimo niya hunahunaon nga an iya kasangkayan pariho hin mga app nga puydi gamiton o isara kon kinahanglan.

HUNAHUNAA INI: An imo ba iginpu-post online nagpapakita nga bangin may-ada ka tendensya nga makigkompetensya o sobra nga magpokus ha imo kalugaringon?​—GALACIA 5:26.

USISAHA AN IMO PAGGAMIT HAN TEKNOLOHIYA

Kon an teknolohiya imo surugoon imbes nga imo agaron, makakabulig ito ha imo nga makigkomunikar ha imo kasangkayan ngan magin mas duok pa ngani ha ira.

Tigamni an mga suhestyon nga karuyag mo buhaton, o isurat an imo ideya.

• Makiistorya hin personal (imbes nga mag-text la o mag-email)

• Ihirayo (o i-silent) an celfon kon nakikiistorya ha iba

• Ibanan an panahon nga akon ginagamit ha pagkinita han mga post ha social media

• Magin mas maopay nga parapamati

• Kontakon an usa nga sangkay nga may problema