Jeʼex k-ilkoʼ maʼ kʼaas u usartik máak le tecnología utiaʼal u saludartik u amigoʼoboʼ, chéen baʼaleʼ wa ku suut vicioil tiʼeʼ jeʼel u yúuchultiʼ le baʼaloʼobaʼ:

• Maʼ tu naʼatik bix u yuʼubikuba u amigoʼob.

• Ku yuʼubikuba chéen tu juunal yéetel maʼ kiʼimak u yóoliʼ.

• Ku tuukul chéen tu yoʼolal.

NAʼAT BIX U YUʼUBIKUBAʼOB

Utiaʼal a naʼatik bix u yuʼubikuba a amigoʼobeʼ kʼaʼabéet a tsʼáaikaba tu lugaroʼob. Wa juntúul máak ku yokol u yil baʼax yaan teʼ redes sociales yéetel chéen ku jáajan núukik le mensajeʼob ku kʼuchultiʼoʼ ku yeʼesik maʼ tu naʼatik bix u yuʼubikuba u amigoʼob.

Le máaxoʼob jach yaʼab u usarkoʼob le tecnologíaoʼ tu lugar u kutal u tukloʼob baʼax jeʼel u núukikoʼob tiʼ u amigoʼobeʼ chéen ku jáan túuxtikoʼob jeʼel baʼalakeʼ tumen u yojloʼob kʼaʼabéet u núukikoʼob. Tsʼoʼoleʼ como ku suuktal u jáajan núukikoʼob tuláakal le mensajeʼob ku kʼuchultiʼoboʼ maʼ tu tsʼáaikoʼob cuenta wa jach tu jaajil táan u kʼáataʼal áantajtiʼob tumen juntúul u amigoʼob.

TUKULT LELAʼ: Kex ku meyajtech le tecnología utiaʼal a tsikbal yéetel a amigoʼoboʼ, ¿bix jeʼel a weʼesik ka naʼatik bix u yuʼubikubaʼobeʼ? (1 PEDRO 3:8).

KU YUʼUBIKUBA CHÉEN TU JUUNAL

Juntéeneʼ kaxtaʼab u jaats máakoʼob utiaʼal ka okok u yiloʼob baʼax ku sen publicartaʼal tiʼ junpʼéel red social jach kʼaj óolaʼan. Le ka tsʼoʼok u yilkoʼob le baʼaxoʼob ku sen publicartaʼaloʼ tu yuʼuboʼob bey maas ku disfrutartik u kuxtal u maasiloʼobeʼ, lelaʼ tu beetaj u jach lúubul u yóoloʼob.

Le ka tu yiloʼob xan le fotoʼob ku naʼaksaʼal teʼ redes socialesoʼ tu tukloʼobeʼ u maasileʼ jach u yojel u divertirtubaʼob, pero letiʼobeʼ maʼatech.

TUKULT LELAʼ: ¿Baʼax jeʼel u yáantkech utiaʼal maʼ u lúubul a wóol le kéen a wil le baʼaxoʼob ku publicartaʼal teʼ redes socialesoʼ? (GÁLATAS 6:4).

KU TUUKUL CHÉEN TU YOʼOLAL

Juntúul maestraeʼ tu tsʼáaj cuentaeʼ u maas yaʼabil tiʼ le paalaloʼob ku kaʼansikoʼ chéen ku biskubaʼob yéetel u amigoʼob yoʼolal interés. * Tsʼoʼoleʼ chéen ku biskubaʼob yéetel le máaxoʼob u yojloʼob jeʼel u beetkoʼob le baʼax ken u kʼáatoʼobtiʼoboʼ. Le máaxoʼob beetik beyaʼ ku yilkoʼob u amigoʼob bey aplicaciónoʼobeʼ tumen chéen ku meyajtiʼob kéen kʼaʼabéetchajaktiʼob.

TUKULT LELAʼ: Le baʼaxoʼob kin tsʼáaik teʼ Internetoʼ, ¿ku yeʼesik wa chéen in kʼáat in presumirt baʼaxoʼob kin sen beetik? (GÁLATAS 5:26).

TUKULT BIX TÁAN A USARTIK LE TECNOLOGÍAOʼ

Wa ka kanik a usart tubeel le tecnologíaoʼ jeʼel u yáantkech utiaʼal a tsikbal yéetel a amigoʼobeʼ yéetel utiaʼal maʼ u xuʼulul a biskaba tu yéeteloʼob.

Tukult bey baʼaxoʼob jeʼel u yáantkecheʼ yéetel tsʼíibte

• ¿Maas wa uts tin tʼaan in tsikbal yéetel in amigoʼob le táan in wilkoʼoboʼ wa maas uts tin tʼaan in tsikbal chéen tiʼ mensaje wa tiʼ correo electrónico?

• ¿Le táan in tsikbal yéetel u maasiloʼ kin wilik wa maʼ in usartik in celular?

• ¿Kin pʼisik wa le tiempo kin máansik teʼ redes socialesoʼ?

• ¿Kin chʼenxikintik wa baʼax ku tsikbaltikten u maasil?

• ¿Kin tsikbal wa yéetel juntúul in amigo kéen in wojéelt yaan baʼax táan u aktáantik ichil u kuxtal?