Peru ca binni ni riquiiñeʼ si tecnología para guiniʼné ca xhamigu zanda gápacaʼ guendanagana casi ca ni chiguzéʼtenu riʼ:

• Maʼ huaxiéʼ rizaaláʼdxicaʼ ca xhamígucaʼ.

• Runi sentircaʼ stúbicaʼ ne guirutiʼ rizaalaʼdxiʼ laacaʼ.

• Puru si para laacaʼ ruyúbicaʼ.

EMPATÍA

Para gusihuínninu empatía caquiiñeʼ guiníʼ ique chaahuinu ni cayuni sentir sti binni. Qué zanda gúninu ndiʼ pa nisi maʼ cadúʼyanu ca publicación ni rihuinni lu ca red social ne maʼ cuséʼndanu mensaje.

Pa guni controlar tecnología lii la? zándaca zacábiluʼ ca mensaje guseendaʼ ca xhamíguluʼ ra nuuluʼ purtiʼ si caquiiñeʼ gúniluʼ ni. Pa gúniluʼ ni bizéʼtenu riʼ, nagueendaca zacábiluʼ ca mensaje guseendacabe ra nuuluʼ, peru qué zacaneluʼ ti xhamíguluʼ ni cadiʼdiʼ ra nagana.

GUNÍʼ IQUE NDIʼ: Ora riquiiñeluʼ tecnología, ¿ximodo zanda gusihuínniluʼ runi sentirluʼ ni cayuni sentir ca xhamíguluʼ? (1 PEDRO 3:8).

RUNI SENTIRCAʼ STÚBICAʼ

Ti estudiu bisihuinni stale binni gucaná despué de biiyacaʼ guiráʼ ni runi publicar ti red social. Caadxi investigador guníʼ ora ruuyaʼ binni foto ne ca comentariu stiʼ xcaadxi binni rucaani laacaʼ guni sentircaʼ stúbicaʼ ne guiníʼ íquecaʼ qué huayúnicaʼ xiixa cosa galán.

Ne cadi ngasi, ora ridúʼyanu ca foto ra rihuinni cayuni binni xiixa nabé galán, zándaca guchaaganu laacabe né laanu ne guiníʼ íquenu nabé galán raca divertírcabe peru laanu nabé aburridu xpídanu.

GUNÍʼ IQUE NDIʼ: ¿Xi zanda gúniluʼ para cadi guchaagaluʼ lii né sti binni ora iquiiñeluʼ red social? (GÁLATAS 6:4).

RUYÚBICAʼ PURU SI PARA LAACAʼ

Ti maestra guníʼ ruyubi ca alumnu stiʼ puru si para laacaʼ ne ruyúbicaʼ gaca xhamígucaʼ ca binni ni zanda gacané ne guni defender laacaʼ. * Ca binni ni runi ni bizéʼtenu riʼ ruyúbisicaʼ ni zanda gudii xcaadxi laacaʼ. Nga runi, zanda gueeda guuyaʼ binni ca xhamigu casi ti aplicación ni zanda guxheleʼ ne guseeguʼ ora si caquiiñeʼ ni.

GUNÍʼ IQUE NDIʼ: Ora rudxiibaluʼ xiixa lu Internet, ¿ñee rusihuínnini riuuláʼdxiluʼ tídiluʼ lú stobi ne ruyúbiluʼ puru si para lii la? (GÁLATAS 5:26).

GUNÍʼ IQUE XIMODO RIQUIIÑELUʼ TECNOLOGÍA

Pa runi controlarluʼ tecnología ne qué rudiiluʼ lugar guni controlar ni lii, ziuuluʼ gaxha de ca xhamíguluʼ ne jma zaca xhamígutu.

Biʼniʼ marcar ca sugerencia ni ñuuláʼdxiluʼ ñúniluʼ o bicaa ni rábiluʼ zanda gúniluʼ:

• Güeniaʼ binni diidxaʼ lugar de guseendaʼ mensaje o correu electrónicu ra nuucaʼ.

• Quixheʼ teléfono stinneʼ ti lugar ra cadi guchiiñaʼ ni naa o guindeteʼ volumen stini ora canieniáʼ tuuxa.

• Guneʼ stipa cadi chuaaʼ stale tiempu lu ca red social.

• Gucaadiaʼgaʼ xcaadxi binni.

• Guinieniaʼ ti xhamiguaʼ ni cadiʼdiʼ ra nagana.