Olee Nsogbu Ekwentị Nwere Ike Ịkpatara Gịnwa n’Onwe Gị?
Ndị mmadụ na-achọ ịmụta ihe ọhụrụ kwa ụbọchị. O nwere ike ịbụ ihe ga-abara ha uru n’ụlọ akwụkwọ, n’ọrụ ha, ma ọ bụ n’ihe ọ bụla ọzọ. Ekwentị na ihe ndị yiri ya nwere ike inyere ha aka. Kemgbe ụwa, o nwetụbeghị mgbe ọ dị mfe mmadụ ịnọ n’ụlọ ya ma ọ bụdị n’oche ya mụta ihe ọ bụla ọ chọrọ karịa ugbu a.
Ma, ọtụtụ ndị na-apịkarị ekwentị ha ma ọ bụ ihe ndị yiri ya achọpụtala na . . .
-
ọ na-esiri ha ike ime ka uche ha dịrị n’ihe ha na-agụ.
-
ọ na-esiri ha ike ịhapụ ịna-eme ọtụtụ ihe otu mgbe.
-
obi na-ajọkarị ha njọ ma ha nọrọ naanị ha.
IHE NDỊ I KWESỊRỊ ỊMA
ỊGỤ IHE
Ndị ịpị ekwentị riri ahụ́ na-agụkarị ihe elu elu kama iwetu obi ala gụọ ihe si n’isi ruo ná ngwụcha ka ha ghọta ihe a na-ekwu.
Mmadụ ịgụ ihe elu elu adịghị njọ ma ọ bụrụ na onye ahụ chọrọ ịmata azịza ihe ozugbo ozugbo. Ma, isi otú a agụ ihe adịghị mma ma ọ bụrụ na onye ahụ chọrọ ịghọta ihe niile ọ na-agụ nke ọma.
IHE Ị GA-ECHEBARA ECHICHE: Ọ̀ na-adịrị gị mfe ịgụ ihe toro ogologo? Olee otú ịgụ ihe toro ogologo ga-esi nyere gị aka ịmụta ihe?—ILU 18:15.
UCHE GỊ ỊDỊ N’IHE Ị NA-EME
Ụfọdụ ndị chere na ekwentị na ihe ndị yiri ya na-enyere ha aka ime ihe abụọ otu mgbe, dị ka ịna-ezigara ndị enyi ha ozi mgbe ha na-amụ ihe. Mana, ebe ọ bụ na ha na-eme ihe abụọ otu mgbe, o nwere ike ime ka uche ha ghara ịdị na nke ọ bụla, ya emezie o nweghị nke ha ga-eme nke ọma na ya.
Ọ bụ eziokwu na mmadụ itinye uche ya n’ihe ọ na-eme anaghị adịcha mfe, ma ọ ga-enyere onye ahụ aka ịmụta ihe. Otu nwatakịrị nwaanyị aha ya bụ Grace kwuru, sị: “Ọ na-eme ka mmadụ ghara ịna-emejọkarị ihe, meekwa ka onye ahụ ghara iji ọtụtụ ihe kpojuo onwe ya isi. Amụtala m na ọ ka mma itinye uche m n’otu ihe karịa ịna-eme ọtụtụ ihe otu mgbe.”
IHE Ị GA-ECHEBARA ECHICHE: Ịpị ekwentị mgbe ị na-amụ ihe ọ̀ na-eme ka ị ghara ịghọtacha ihe ị na-amụ na icheta ihe ị mụrụ?—ILU 17:24.
MGBE Ị NỌ NAANỊ GỊ
Ahụ́ anaghị eru ndị ụfọdụ ala ma ha nọrọ naanị ha n’ebe dị jụụ. Ha na-ewere ekwentị ha pịwa ka obi ghara ịna-ajọ ha njọ. Otu nwaanyị aha ya bụ Olivia kwuru, sị: “Obi na-ebido jọwa m njọ ma m nọọ nkeji iri na ise n’apịghị ekwentị m ma ọ bụ tablet m ma ọ bụkwanụ n’agbanyeghị tiivi.”
Ma, oge mmadụ nọ naanị ya bụ oge magburu onwe ya onye ahụ nwere ike iji chee echiche nke ọma. Ọ ga-enyere onye ahụ aka ịmụta ihe ọ na-amụ, ma onye ahụ ọ̀ bụ onye na-eto eto ma ọ̀ bụ dimkpa.
IHE Ị GA-ECHEBARA ECHICHE: Ị̀ na-eji oge ndị ị nọ naanị gị eche echiche nke ọma?—1 TIMOTI 4:15.
IHE I NWERE IKE IME
LEBA ANYA N’OTÚ I SI APỊ EKWENTỊ NA IHE NDỊ YIRI YA
Olee otú ekwentị na ihe ndị yiri ya ga-esi nyere gị aka ịna-echebara ihe ị na-amụ echiche nke ọma? Ma, olee otú ha nwere ike isi mee ka uche gị ghara ịdị n’ihe ị na-amụ?
AMAOKWU BAỊBỤL GA-ENYERE GỊ AKA: “Jidesie ezigbo amamihe aka ike, na-echebakwara ihe echiche nke ọma.”—ILU 3:21.
Isiokwu A Nwekwara Ike Ịmasị Gị
NDỊ NA-ETO ETO NA-AJỤ, SỊ
Olee Ihe M Ga-eme Ka Uche M Na-adị n’Otu Ihe?
Lee ebe atọ ekwentị na ihe ndị yiri ya nwere ike isi mee ka uche gị ghara ịdị n’ihe ị na-eme. Mụtakwa ihe ị ga-eme ka uche gị nwee ike ịna-adị n’otu ihe.
TETA!
Ọrụ I Ji n’Aka Ọ̀ Karịrị Akarị?
Ọ na-esiri ọtụtụ ndị ike inweta oge ga-ezuru ha iji rụọ ọrụ ha, na nke ga-ezuru ha iji mee ihe ndị dị n’ụlọ. Olee ihe na-akpata ya? Gịnị nwere ike ike inye aka?
NDỊ NA-ETO ETO NA-AJỤ, SỊ
Ọ̀ Dị Mma Mmadụ Ịna-eme Ọtụtụ Ihe Otu Mgbe?
Ọ̀ bụ eziokwu na ị ga-emeli ọtụtụ ihe n’otu oge ma tinyechaa uche na nke ọ bụla?
