¿Tiʼ nya bʼaʼn jaku tzaj tiʼn tecnología tiʼj qximbʼetz?
Kukx in nel kynikʼ xjal kyiʼj junjun tiʼchaq ik tzeʼn aj kyten toj tja xnaqʼtzbʼil, toj aqʼuntl moqa toj junjuntl ambʼil. Ex nim jaku tzʼonin tecnología kyiʼj tuʼn tel kynikʼ tiʼj nimku xnaqʼtzbʼil ex mintiʼ tuʼn kyex kyja, axpe ikx mintiʼ tuʼn kyjaw weʼ toj kyqʼuqbʼil.
Aʼyeju xjal in najbʼen nim tecnología kyuʼn, jaku tzaj nya bʼaʼn kyiʼj ik tzeʼn qe jlu:
-
Kwest tuʼn tok kyqʼoʼn kywiʼ tiʼjju in jaw kyuʼjin.
-
Kwest in nela toj kywitz tuʼn tok kyqʼoʼn kywiʼ tiʼj jun tiʼ.
-
Jun rat in bʼaj kygan aj kyten kyjunalx.
AJU NIM TOKLEN TUʼN TEL TNIKʼA TIʼJ
AJ TUʼJINA
Tuʼnju oʼkx tok kywiʼ xjal tiʼj tecnología, mintiʼ in ten kypasens aj tjaw kyuʼjin jun xnaqʼtzbʼil moqa jun libro. Oʼkx in nok kykeʼyin alqiʼj in yolin.
Jun rat jaku kanet tzaqʼwebʼil quʼn tiʼj jun xjel qa oʼkx in nok qkeʼyin jun xnaqʼtzbʼil. Pero mlay tzʼonin jlu qiʼj qa qaj tuʼn telxix qnikʼ tiʼj jun xnaqʼtzbʼil.
XIMANA TIʼJ JLU: ¿Kwestpe tuʼn tjaw tuʼjina jun xnaqʼtzbʼil nim tqan? ¿Tiquʼn in kubʼ t-ximana qa jaku tzʼonin jlu tiʼja qa ma tzʼok tilil tuʼna tuʼn t-xi tbʼinchaʼna? (PROVERBIOS 18:15).
AJ T-XIMANA
Ateʼ junjun xjal in kubʼ kyximen qa in nonin tecnología kyiʼj tuʼn tbʼant kabʼe tiʼ kyuʼn toj ax ambʼil, ik tzeʼn tuʼn kyxnaqʼtzan ex tuʼn t-xi kytzʼibʼin mensaje kye kyamiw. Pero qa mintiʼ ma tzʼok qqʼoʼn qwiʼ tiʼjju in qbʼinchaʼn ex mas qa nim toklen, ni jun kʼelel bʼaʼn.
Tuʼn tok qqʼoʼn qwiʼ tiʼj jun tiʼ, nim toklen tuʼn tbʼant qjukʼunte qibʼ. Pero tbʼanel qa ma tzʼok tilil quʼn. In tzaj tqʼamaʼn jun txin jlu, aju Grace tbʼi: «Mas mintiʼ in nel txalpaja ex mintiʼxix in sikta. O tzʼel nnikʼe tiʼj qa mas bʼaʼn tuʼn tok qqʼoʼn qwiʼ tiʼj jun tiʼ twitzju tuʼn t-xi qbʼinchaʼn nim tiʼchaq toj ax ambʼil».
XIMANA TIʼJ JLU: ¿Kwestpe tuʼn ttzaj tnaʼna aju in kubʼ t-xnaqʼtzaʼna tuʼn tpaj tecnología? (PROVERBIOS 17:24).
AJ TTENA TJUNALXA
Ateʼ junjun xjal nya kygan tuʼn kyten kyjunalx ex qa mintiʼ jun tiʼ tuʼn t-xi kybʼinchaʼn. Tuʼntzunju, in najbʼen tecnología kyuʼn tuʼn miʼn tkubʼ kynaʼn qa kyjunalx ateʼ. In tzaj tqʼamaʼn jun xuʼj Olivia tbʼi jlu: «Mlayx tzikʼx 15 minut wuʼne tuʼn miʼn tok nqʼoʼne nwitze tiʼj celular, tiʼj tableta moqa tiʼj televisión tuʼnju in bʼaj ngane».
Noqtzun tuʼnj, qkyaqilx nim toklen tuʼn tel qpaʼn ambʼil tuʼn qten qjunalx tuʼntzun qximen tiʼjju otoq tzʼel qnikʼ tiʼj. Nim toklen jlu qa in qo xnaqʼtzan tiʼj jun tiʼ.
XIMANA TIʼJ JLU: Aj ttena tjunalxa, ¿in najbʼenpe ambʼil tuʼna tuʼn t-ximana? (1 TIMOTEO 4:15).
AJU JAKU BʼANT TUʼNA
XIMANA TIʼJ TZEʼN IN NAJBʼEN TECNOLOGÍA TUʼNA
¿Tzeʼn jaku tzʼonin tecnología tiʼja tuʼn tel mas tnikʼa kyiʼj xnaqʼtzbʼil? ¿Ex tiʼ nya bʼaʼn jaku tzaj tiʼja tuʼn tecnología qa ma tzʼajbʼen tuʼna aj t-xnaqʼtzana?
NABʼIL TOJ TYOL DIOS: «Miʼn kyaj tkolina aju tnabʼla bʼaʼn» (PROVERBIOS 3:21).
Bʼalo ax ikx tgana jlu
KYXJEL KUʼXUN
Qa kwest tuʼn tok nqʼoʼn nwiʼye tiʼ jun tiʼ, ¿tiʼ jaku bʼant wuʼne?
Toj xnaqʼtzbʼil lu, ktzajel qʼamaʼn oxe ambʼil jatumel mintiʼ in nonin tecnología tiʼja tuʼn tok tqʼoʼn twiʼya tiʼjju in bʼant tuʼna.
KYXJEL KUʼXUN
¿Jakupe che bʼant nim tiʼchaq tuʼna toj ax ambʼil?
Qa ma bʼant nim tiʼchaq tuʼna toj ax ambʼil, ¿jakupe che el toj tbʼanel?
