Kouma Eski Teknolozi Kapav Afekte Ou Fason Panse?
Bann dimounn touletan pe aprann, par exanp, pou lekol, pou travay, ouswa pou lezot kitsoz, ek teknolozi kapav ed zot. Sa inn vinn bien fasil aster pou gagn enn maximum informasion, san ki nou bizin kit nou lakaz ouswa lev depi lor nou sez.
Me selman, bann dimounn ki servi teknolozi boukou, zot finn trouve ki zot . . .
-
gagn difikilte pou konsantre kan zot lir.
-
pa kapav konsantre lor enn sel kitsoz.
-
plin kan zot tousel.
SEKI OU BIZIN KONE
KAN OU LIR
Souvan bann dimounn ki servi bann laparey elektronik pena pasians pou lir enn liv ouswa enn lartik net, alor zot zis lir li lao-lao.
Lir lao-lao li kapav interesan si nou zis bizin gagn enn repons vit-vit. Me, se pa enn bon fason pou lir si nou anvi vremem konpran size-la.
REFLESI LOR LA: Eski ou gagn difikilte pou lir bann long paragraf? Kifer ou aprann plis kan ou pran letan pou lir bien?—PROVERB 18:15.
KAN OU KONSANTRE
Sertin dimounn esey servi teknolozi pou fer plizir travay anmemtan. Par exanp, zot kapav avoy zot kamarad mesaz anmemtan ki zot pe fer devwar. Me parski zot pe konsantre lor plizir kitsoz anmemtan, zot pa reisi fer okenn parmi sa bann kitsoz-la bien.
Mem si li difisil pou konsantre ek pou evit fer lezot kitsoz anmemtan, li vo lapenn fer sa zefor-la. Enn adolesan ki apel Grace dir: “To fer mwins erer ek to mwins strese. Mo’nn aprann ki li pli bon konsantre lor enn sel kitsoz ek evit get ouswa fer lezot kitsoz anmemtan.”
REFLESI LOR LA: Eski teknolozi rann li pli difisil pou ou konsantre ek rapel seki ou’nn aprann?—PROVERB 17:24.
KAN OU TOUSEL
Ena dimounn pa kontan res tousel, alor zot servi teknolozi pou okip zot lespri. Enn madam ki apel Olivia dir: “Si 15 minit pase san ki mo chek mo portab, mo tablet, ouswa alim televizion, mo fini koumans plin.”
Parkont, ki li pou bann adilt ouswa bann zenn, pou ki zot vremem aprann kitsoz, li inportan ki zot servi letan kan zot tousel pou reflesi ek medite.
REFLESI LOR LA: Eski kan ou tousel, ou servi sa letan-la pou reflesi?—1 TIMOTE 4:15, NW.
SEKI OU KAPAV FER
REFLESI LOR FASON KI OU SERVI TEKNOLOZI
Ki bann fason ou kapav servi teknolozi pou amelior ou kapasite pou reflesi? Kouma eski teknolozi kapav anpes ou konsantre ouswa aprann?
PRINSIP LABIB: “Gard sazes pratik ek kapasite pou reflesi.”—PROVERB 3:21.
