Vino Ivyakupangapanga Vingalenga Imyelenganyizizye Inu Ukuya
Antu yakalondekwa ukusambilila ivintu ivingi ivya kusukulu, vya ku ncito nanti vintu vyuze. Ivyakupangapanga vingazwa antu ukusambilila. Mpiti citacitikanga ukuti muntu azane ivyeo ivingi vino akulonda ukwaula ukuti afume pa ng’anda.
Lelo aakaomvya sana ivyakupangapanga yakazana ukuti . . .
-
cikuyatalila ukwika mano ku kubelenga.
-
cikuyatalila ukwika mano ku mulimo uno yakuomba.
-
yakuvwa icitendwe nga yasikuomvya ivyakupangapanga.
VINO MULINZILE UKUMANYA
UZYE IVYAKUPANGAPANGA VIKALENGA CIYE ULI LINO MUKUBELENGA?
Antu aakaomvya sana viombelo vya malaiti, insita zimwi yakabelenga zuwa zuwa pakuti yamanye sile icikulandwapo.
Kubelenga lwilo lwilo kwaya ningo ndi cakuti ukulonda ukuzana zuwa icasuko ukwi uzyo limwi. Nomba ukucita vivyo, kutaya ningo ndi icakuti ukulonda ukuvwikisya sana icikulandwapo.
VINO MULINZILE UKWELENGANYAPO: Uzye mukaikako sana mano lino mukubelenga ivipande ivitali? Uzye ukwika mano kuli vino mukubelenga kungalenga mwaipakizya uli lino mukubelenga?—MAPINDA 18:15.
UZYE IVYAKUPANGAPANGA VIKALENGA CAMUTALILA UKWIKA MANO KULI VINO MUKUCITA?
Yamwi yakaelenganya ukuti ivyakupangapanga vingalenga yaomba imilimo iili pa muku onga, wakwe, kulembela ya cuza yao mameseji kuu nako ala yakuisambilizya. Nomba yakapumvyanyiziwa icakuti iyafilwa nu kuomba umulimo uli onsi pali yoili, maka maka ndi cakuti ikulondekwa ukwikako sana mano.
Cikalondekwa ukuombesya pakuti mwike mano kuli vino mukucita nu kutaluka uku vingamupumvyanya nupya nga mwacita vivyo mungaipakizya lino mukusambilila. Mukazyana uwi zina ilyakuti Grace walanzile ukuti: “Nasambilila ivyakwika mano uku cintu conga nu kutaluka uku vingampumvyanya. Nupya ukucita vii kukangazwa ukukanaluvyanya sana nu kucefyako masakamika.”
VINO MULINZILE UKWELENGANYAPO: Uzye ivyakupangapanga vikalenga camutalila ukwika mano kuli vino mukucita nu kwiusya vino imusambilila?—MAPINDA 17:24.
UZYE IVYAKUPANGAPANGA VIKALENGA MWACITA ULI LINO MULI MWENGA?
Antu yamwi yakauvwa uyi nga yali yonga fwandi yakaomvya ivyakupangapanga pakuti yaisansamusye. Umwanaci uwi zina lyakuti Olivia walanzile ukuti: “Nkauvwa icitendwe ndi cakuti nikala sile mamineti 15 ukwaula ukutinika foni, tabuleti, nanti ukwasya TV.”
Nomba pakuti umuntu asambilile, akalondekwa ukukwata insita iya kuya wenga pakuti aelenganye pali vino akusambilila, ciye umwance nanti uwikolo.
VINO MULINZILE UKWELENGANYAPO: Uzye lino muli mwenga mukaomvya insita iyo ku kwelenganya pali vino mukusambilila?—1 TIMOTI 4:15.
VINO MUNGACITA
MWACEECETA VINO MUKAOMVYA IVYAKUPANGAPANGA
Uzye mungaomvya uli ivyakupangapanga pakuti vimwazwe ukusambilila? Uzye ivyakupangapanga vingalenga uli mwafilwa ukwika mano kuli vino mukucita na kuli vino mukusambilila?
CISINTE CA MULI BAIBO: “Uwaika umwenzo uku mano nu ku kucenjela.”—MAPINDA 3:21.
