¿Kenijkatsa Internet kintlanauia maseualmej inintlalnamikilis?
Maseualmej kiyekouaj miak tlamantli kema yauij escuela, ipan ininteki o kampa nentinemij. Uan Internet nojkia uelis kinpaleuis. Ipan ni tonali, uelis nima tijmatis se tlamantli maske san tiitstos mochaj o san timoseuijtos.
Maske tlauel tlapaleuia Internet, maseualmej uelis kinpanos ni tlamantli tlaj tlauel kitekiuisej:
-
Amo mosentlalisej kema tlapouaj.
-
Amo mosentlalisej kichiuasej se tlamantli.
-
Nima kuesiuisej kema itstosej ininselti.
TLEN MONEKI TIJMATIS
KEMA TLAPOUAJ
Se keskij maseualmej kipojtiuetsij se tlamantli uan amo moiljuiaj ipan tlen kipouaj.
Maske nima tikasis kenijkatsa monankilia se tlajtlanili kema tijpojtiuetsis se tlamantli, amo mitspaleuis tijkuamachilis se tlamantli tlen ouij.
XIMOILJUI NI: ¿Tijmati ouij tijpouas se texto tlen ueueyak? ¿Kenijkatsa timoiljuia mitspaleuis tlaj tijchiuas kampeka tijpouas? (PROVERBIOS 18:15).
AMO MOSENTLALIAJ IPAN SE TLAMANTLI
Se keskij maseualmej moiljuiaj uelis kichiuasej ome tlamantli pampa kipiaj Internet: kintlajkuiljuilisej ininuampoyouaj kema momachtiaj. Maske kiampa kichiuaj, amo mosentlaliaj ipan se tlamantli uan amo kuali kisas yon se.
Tlaj tijnekij timosentlalisej san ipan se tlamantli, moneki timonauatisej. Tlauel techpaleuis tlaj kiampa tijchiuasej. Se ichpokatl katli itoka Grace, kiijtoua: “Amo tlauel timokuapolos yon timotekipachos. Tlauel nechpaleuia kema nimosentlalia nijchiuas se tlamantli”.
XIMOILJUI NI: Kema tijchijtinemi miak tlamantli, ¿ouij tijmati tijkuamachilis uan tikilnamikis tlen timomachtik? (PROVERBIOS 17:24).
KIYOLMATIJ ITSTOKEJ ININSELTI
Se keskij maseualmej kinekij kichiuasej miak tlamantli kema itstokej ininselti uan kitekiuiaj Internet pampa amo kuali kiyolmatij. Se siuatl katli itoka Olivia, kiijtoua: “Nima nijtlachilia nocelular, notableta o nijtlatia televisión. Amo nijkaua ma pano yon 15 minutos kiampa nijchiuas pampa tlauel nikuesiui”.
Nochi tijnekij kemantika tiitstosej toselti pampa kiampa uelis timoyoliljuisej ipan tlen tijyekojtokej. Kema timoyoliljuiaj, techpaleuia ma tijyekokaj sekinok tlamantli.
XIMOILJUI NI: ¿Tijchiua kampeka timoyoliljuis kema tiitstok moselti? (1 TIMOTEO 4:15).
TLEN UELIS TIJCHIUAS
KUALI XIMOILJUI KENIJKATSA TIJTEKIUIS INTERNET
¿Kenijkatsa Internet mitspaleuis xijyeko sekinok tlamantli? ¿Kenijkatsa uelis kichiuas amo ximosentlali kema tijyekoua se tlamantli?
TLEN BIBLIA TETLAJTOLMAKA: “Xijpia kuali tlalnamikilistli uan xijtlakakili ni tlalnamijkatlajtoli, axkema xikinilkaua” (PROVERBIOS 3:21).
