Thekinolotši e ka Senya Tsela Yeo o Ithutago Bjang?
Batho ba dula ba ithuta. Ba ka ba ba ithutela dilo tša sekolo, mošomo goba dilo tše dingwe. Thekinolotši e ka thuša batho go ithuta. Matšatši a go bonolo kudu go hwetša boitsebišo le ge e le bofe o dutše ka gae.
Eupša batho ba bantši bao ba dirišago thekinolotši kudu . . .
-
ge ba bala ba thatafalelwa ke go nagana ka seo ba se balago.
-
ba ikhwetša ba šitišega gabonolo.
-
ba ikhwetša ba lewa ke bodutu ge ba le noši.
SEO O SWANETŠEGO GO SE TSEBA
GO BALA
Gantši batho bao ba dirišago didirišwa tša elektroniki kudu ga ba kgone go bala sehlogo goba puku ka moka, ka gona ba no itlhatlola ge ba bala.
Ga se phošo go fo fetiša mahlo ka pejana ge e ba o nyaka go hwetša karabo ya potšišo ya gago. Eupša go no fetiša mahlo ge o bala go ka se go hole ge e ba o tloga o nyaka go kwešiša seo o se balago.
SEO O KA NAGANGO KA SONA: Na o kgona go bala kgaolo e telele? Go kgona go bala selo ka kelohloko go ka go thuša bjang ge o nyaka go ithuta?—DIEMA 18:15.
GO BEA MOGOPOLO GO SEO O SE DIRAGO
Batho ba bangwe ba leka go diriša thekinolotši go dira dilo tše dintši ka nako e tee, go swana le go araba melaetša ge ba dutše ba ithuta. Eupša ba šitišega gabonolo e bile ba ka palelwa ke go dira dilo tše dingwe gabotse, kudukudu ge e ba dilo tšeo di nyaka gore ba bee mogopolo go tšona.
Le ge go le thata go bea mogopolo go seo o se balago, le go phema ditšhitišo, seo se ka go thuša. Grace o re: “Seo se ka go thuša gore o se dire diphošo tše dintši le go go fokoletša stress. “Ke ithutile gore go kaone go bea mogopolo go selo se tee le go phema go dira dilo tše dintši ka nako e tee.”
SEO O KA NAGANAGO KA SONA: Na thekinolotši e dira gore go be thata go bea mogopolo go seo o se balago le go gopola seo o ithutago?—DIEMA 17:24.
GO BA NOŠI
Batho ba bangwe ga ba rate go ba noši ka gona ba itloša bodutu ka go diriša thekinolotši. Mosadi yo a bitšwago Olivia o re: “Go ka se fete metsotso e 15 ke sa bale melaetša founong goba thaboleteng goba ke sa bogele TV.”
Le ge go le bjalo, go ba noši go thuša batho gore ba kgone go naganišiša, e lego karolo e bohlokwa ya go ithuta.
SEO O KA NAGANAGO KA SONA: Na ge o le noši o diriša nako yeo gore o kgone go nagana? —1 TIMOTHEO 4:15.
SEO O KA SE DIRAGO
HLAHLOBA TSELA YEO O DIRIŠAGO THEKINOLOTŠI KA YONA
O ka diriša bjang thekinolotši gore o kgone go ithuta? Thekinolotši e ka go šitiša bjang ge o ithuta le go bea mogopolo go seo o se balago?
KELETŠO YA BEIBELE: “Lota bohlale le tlhaologanyo.”—DIEMA 3:21.
You May Also Like
BAFSA BA A BOTŠIŠA
Nka Dira Eng Gore ke se ke ka Šitišega?
Ke dilo dife tše tharo tšeo thekinolotši e ka re šitišago ge re dutše re di dira? Gona re ka dira eng gore re se ke ra šitišega?
PHAFOGA!
Na o Dula o Swaregile?
Batho ba bantši ba boletše gore ba thatafalelwa ke go swaragana le mošomo wa bona le go hlokomela lapa. Bothata bjo bo bakwa ke eng? Bo ka lokišwa bjang?
BAFSA BA A BOTŠIŠA
Na Nka Kgona go Dira Dilo Tše Dintši ka Nako e Tee?
Na o ka kgona go dira dilo tše dintši ka nako e tee o sa šitišege?
