Hao Nao Technology Affectim Tingting blo Iu?
Evritaem pipol gohed lanem niu information for skul, waka, or maet for eni nara reason. Technology savve help lo datwan. Winim enitaem lo history, distaem hem isi tumas for kasem staka information, nomata iu stap lo haos or iu sidaon nomoa lo chair blo iu.
Bat, staka wea gohed iusim tumas technology olketa faendem dat . . .
-
hem hard for concentrate taem olketa read.
-
hem hard for olketa concentrate for duim wanfala samting nomoa.
-
olketa savve boring tumas taem olketa stap seleva.
SAMTING IU NEED FOR SAVVE
READING
Taem samfala read, olketa savve scroll fast thru lo information winim wei for patient for readim full story.
Kaen wei for read fast olsem hem gud taem iu laek kwiktaem for faendem ansa for wanfala kwestin. Bat, datwan savve spoelem hao man minim full story and wei for ting raonem gud wanfala subject.
SAMTING FOR TINGIM: Waswe, taem iu readim staka information, iu savve readim gud? Sapos iu duim datwan, hao nao datwan savve helpem iu for lane?—PROVEBS 18:15.
CONCENTRATE
Samfala pipol tingse technology savve mekem hem isi for duim tufala samting semtaem. Olsem example, for textim olketa frens and study lo semtaem. Bat sapos mind hem busy lo tufala samting, bae hard for iu duim gud tufala evriwan, especially taem iu duim samting wea iu need for concentrate lo hem.
For concentrate, iu need for disciplinem iuseleva. Taem iu duim datwan hem bae barava helpem iu. Wanfala teenager wea nem blo hem Grace sei, “Taem iu no mekem staka mistek bae iu no stress tumas. Mi luksavve dat hem gud for concentrate lo wanfala samting nomoa winim wei for duim staka samting lo semtaem.”
SAMTING FOR TINGIM: Waswe, technology mekem hem hard for iu concentrate and for rememberim wat iu studyim?—PROVEBS 17:24.
STAP SELEVA
Samfala pipol faendem hem hard for stap seleva, so olketa savve busy nao lo technology. Wanfala woman wea nem blo hem Olivia sei, “Sapos mi no chekim phone, tablet, or onem TV for 15 minute, mi savve boring tumas.”
Bat, taem iu stap seleva hem wanfala important chance for iu really ting raonem olketa samting. Diswan hem important no for olketa young pipol nomoa bat for olketa adult tu.
SAMTING FOR TINGIM: Taem iu stap seleva, waswe, iu mekius lo datfala chance for ting raonem olketa samting?—1 TIMOTHY 4:15.
WAT IU SAVVE DUIM
LUKLUK GUD LO HAO IU IUSIM TECHNOLOGY
Hao nao iu savve iusim technology for helpem iu lanem moa samting? Lo olketa wanem wei nao technology savve spoelem wei wea iu concentrate and hao iu lane?
BIBLE PRINCIPLE: “Holetaet long waes blong yu, an kipim gudfala tingting.”—PROVEBS 3:21.
Iu Laek Lukim Nara Samting?
OLKETA KWESTIN WEA YOUNG PIPOL GAREM
Wanem Nao Bae Helpem Mi for Concentrate?
Tingim thrifala area lo laef wea technology savve mekem iu for no concentrate and olketa samting wea iu savve duim for helpem iu concentrate.
OLKETA KWESTIN WEA YOUNG PIPOL GAREM
Waswe, Hem Gud for Duim Staka Samting lo Semtaem?
Hao, iu savve duim gud staka samting lo semtaem?
