¿Celularcunaca ima shinataj ñucanchij yuyaita llaquichi tucun?
Escuelapi cashpa, trabajopi cashpa o shujta lugarpi cashpapish achca cosascunata yachashpami catinchij. Cunan tiempopica hasta huasillapitaj cashpami celularta utilizashpa imatapish yachanaca jahualla can.
Pero celularta dimastij utilizaj gentecunaca cashna laya llaquicunatami chari tucun:
-
Liyicushpaca mana concentrari tucuncunachu.
-
Imatapish rurangapaj mana concentrarincunachu.
-
Sololla cashpaca ratomi aburrido sintirincuna.
CAITAMI YACHANA CANGUI
LIYINAMANTA
Huaquinpica celularta o tabletta dimastij utilizajcunaca imata liyicushpaca tucuita liyinapaj randi, alli yuyashpa liyinapaj randica ratomi jahua jahualla liyincuna.
Maipica shuj respuestallata taringapajca utca liyinaca allimi can. Pero shuj temamanta alli yachasha nishpaca imata liyishcata alli intindishpami liyina canchij.
CAIPI YUYAI: ¿Achcata liyina cashpaca ratochu aburrido sintiringui? ¿Liyicushpaca alli intindingapaj esforzarinaca imamantataj alli can? (PROVERBIOS 18:15).
CONCENTRARINAMANTA
Huaquin gentecunaca chai ratollataj chꞌican chꞌican cosascunata rurangapajmi celularcunata o computadoracunata utilizancuna. Chaimi estudiana ratopica paipaj amigocunamanpish mensajecunata cachancuna. Pero chai ratollataj caita chaita rurasha nishpaca ni shujllatapish mana alli rurai tucungacunachu.
Concentraringapajca ñucanchijllataj jarcarinatami yachana canchij. Grace shuti solteraca: “Chai ratollapitaj chꞌican chꞌican cosascunata ruranapaj randica shujlla ruraipi concentrarinami alli cashcata cuentata cushcani. Chashnami imatapish rurashpaca ña mana tanto pandarini. Shinallataj ña mana dimastij preocuparinichu” ninmi.
CAIPI YUYAI: ¿Estudiana horaspi shujtaj cosascunata rurashcamantachu imata yachacushcata cungaringui? (PROVERBIOS 17:24).
QUIQUINLLA CANAMANTA
Huaquin gentecunaca sololla canata mana munashcamantami celularta o tabletta utilizancuna. Olivia shuti huarmica: “15 minutosllata celularta, tabletta o televisionta mana ricushcamantami aburrida sintirini” ninmi.
Pero imatapish ashtahuan yachasha nishpaca jovencuna cashpapish mayorllacuna cashpapish sololla canatami minishtinchij. Chashnami ima estudiashcapi yuyai tucunchij.
CAIPI YUYAI: ¿Can sololla cashpaca imata yachacushcapi yuyaringapaj tiempota surcunguichu? (1 TIMOTEO 4:15).
CAITAMI RURAI TUCUNGUI
CELULARTA IMA SHINA UTILIZACUSHCATA YUYAI
¿Ashtahuan yachashpa catingapajca celularta o tablettaca ima shinataj utilizai tucungui?¿Can estudiacuj ratoca tabletpish celularpish ima shinataj concentrarichun jarcai tucun?
BIBLIAPAJ CONSEJO: “Alli yachaitapish, yuyaitapish huaquichingui” (PROVERBIOS 3:21, NWT).
