Tekinolojee Ne Qofaa Waati Qohana Danddayii?
Asay timirttiyawu, oosuwawu woy harabawu gidin darobaa tamaarees. Eti tamaaranaadan tekinolojee maaddana danddayees. Asi deˈido wode awudeegaappenne aaruwan asay ha wodiyan sooppe kiyennan, ubba uttosaappe denddennan darobaa erana danddayees.
SHin tekinolojiyaa loytti goˈettiya asati kaallidi deˈiyaabati banttana gakkana danddayiyoogaa akeekidosona.
-
Nabbabiyo wode eta qofay shaahettees.
-
Eta qofay eesuwan shaahettees.
-
Banttarkka deˈiyo wode sohuwaara salettoosona.
NE ERANA KOSHSHIYAABAA
NABBABIYO WODE
Elektronike miishshata darotoo goˈettiya asay issi issitoo kumetta huuphe yohuwaa nabbabidi wurssana danddayenna gishshawu, waanna qofaa eesuwan nabbabees.
Issi oyshaa zaaruwaa demmanawu neeni koyiyo wode eesuwan nabbabiyoogee loˈˈo. SHin issibaa neeni eranawu tumuppe koyiyaaba gidikko, hegaadan nabbabiyoogee loˈˈo gidenna.
QOPPANA KOSHSHIYAABAA: Issi adussaa xuufiyaa ay keena loytta nabbabay? Hegaadan oottiyoogan kaseegaappe aaruwan loytta nabbabanawu waatana danddayay?—LEEMISO 18:15.
QOFAY SHAAHETTANAADAN OOTTEES
Amarida asati issi kutti darobaa oottanawu tekinolojiyaa goˈettoosona. Leemisuwawu, xannaˈiiddi laggetussi kiitaa kiittoosona. SHin eta qofay shaahettiyo gishshawu, eti issuwaakka loytti oottokkona.
Qofay shaahettennan issibaa oottiyoogee metiyaaba gidikkonne, baaxetiyoogee nena keehi maaddana. Gireeso giyo yelagiyaa hagaadan gaasu: “Darotoo balabaa oottennaagee, unˈˈettennaadan maaddees. Issi kutti issibaa xallaa oottiyoogee qofay shaahettennaadan oottiya keehi loˈˈoba gidiyoogaa akeekaas.”
QOPPANA KOSHSHIYAABAA: Tekinolojee ne qofay shaahettanadaaninne xannaˈidobaa hassayennaadan oottii?—LEEMISO 17:24.
NERKKA DEˈIYO WODE
Issi issi asati boorasiyo gishshawu, allaxxanawu tekinolojiyaa goˈettoosona. Oliviya giyo maccaasiyaa hagaadan gaasu: “Ta silkkiyaa, taabiletiyaa woy televizhiiniyaa dooyennan 15 daqiiqa takkiyoogeekka tana salettees.”
SHin asay tamaaridobaa barkka wotti dentti qoppanawu wodiyaa bazzana koshshees.
QOPPANA KOSHSHIYAABAA: Neeni nerkka deˈiyo wodiyaa wotta dentta qoppanawu goˈettay?—1 XIMOOTIYOOSA 4:15.
AY OOTTANA DANDDAYAY?
TEKINOLOJIYAA NEENI GOˈETTIYO OGIYAA QORA
Neeni issibaa eranaadan maaddiya ogiyan tekinolojiyaa waata goˈettana danddayay? Tekinolojee ne qofay shaahettanadaaninne issibaa neeni akeekennaadan waati oottana danddayii?
GEESHSHA MAXAAFAY YOOTIYO MAARAA: “Lo77o aadhdhida eratettaanne adussi qoppiyoogaa naaga.”—LEEMISO 3:21.
