Paonan-o an Teknolohiya Nakakaapekto ha Imo Abilidad nga Mahibaro?
Damu an kinahanglan hibaroan—para man ito ha eskwelahan, ha trabaho, o ha iba pa nga hinungdan. Makakabulig an teknolohiya. Yana pa gud la nahitabo nga masayon na la an pakakuha hin damu hinduro nga impormasyon, nga diri mo na kinahanglan bumaya ha imo balay o bisan bumuhat.
Pero damu nga mahilig gumamit hin teknolohiya an nakapansin nga . . .
-
nakukurian hira pagpokus kon nagbabasa.
-
madali mawara an ira pokus ha usa nga buruhaton.
-
madali hira mauyam kon nag-uusahan.
AN ANGAY MO MAHIBAROAN
PAGBASA
May mga tawo nga nahuhubya pagbasa han usa ka bug-os nga artikulo o libro salit pahapyaw la nira ito nga ginbabasa.
Okey la an pahapyaw nga pagbasa kon kinahanglan mo dayon mabilngan an baton ha usa nga pakiana. Pero diri ito makakabulig kon kinahanglan mo masabtan hin bug-os an usa nga topiko.
HUNAHUNAA INI: Kaya mo ba basahon hin maopay an higlaba nga barasahon? Paonan-o an pagbuhat hito makakabulig ha imo nga mas mahibaro?—PROBERBIOS 18:15.
PAGPOKUS
May mga naghuhunahuna nga tungod han teknolohiya kaya nira pagdunganon an duha nga buruhaton—pananglitan, mag-text ha kasangkayan samtang nag-aaram. Pero kon nababahin an ira atensyon, bangin diri nira mahimo hin maopay an bisan hain hito, labi na kon ito nga duha pariho nagkikinahanglan hin pagpokus.
An pagpokus nagkikinahanglan hin disiplina ha kalugaringon, pero bawi an pangalimbasog nga buhaton ito. “Mas gutiay an imo sayop ngan diri duro an imo istres,” siring han tin-edyer nga hi Grace. “Nahibaroan ko nga mas maopay nga magpokus ha usa la nga butang imbes nga pagdurunganon an damu nga buruhaton.”
HUNAHUNAA INI: Nakukurian ka ba masabtan ngan mahinumdoman an imo gin-aadman kay diri ka nakakapokus tungod han teknolohiya?—PROBERBIOS 17:24.
PAG-USAHAN
May mga tawo nga diri nahimumuruko kon nag-uusahan ha mamingaw nga palibot, ngan nagamit hira hin teknolohiya basi malibang. “Waray pa 15 minutos nauuyam na ako kon diri ko ginkikita an akon celfon o tablet o gin-aabrihan an TV,” siring han babaye nga hi Olivia.
Pero an pag-usahan maopay nga higayon ha pagpamalandong—usa nga importante nga bahin han paghibaro, diri la para ha mga batan-on kondi pati liwat ha mga adulto.
HUNAHUNAA INI: Kon nag-uusahan ka, ginagamit mo ba ito nga panahon basi maghunahuna?—1 TIMOTEO 4:15.
AN PUYDI MO BUHATON
USISAHA AN IMO PAGGAMIT HAN TEKNOLOHIYA
Ha ano nga mga paagi mo magagamit an teknolohiya basi mapauswag an imo abilidad nga mahibaro? Paonan-o an teknolohiya makakaapekto ha imo abilidad nga magpokus ngan mahibaro?
PRINSIPYO HA BIBLIA: “Panalipdi an praktikal nga kinaadman ngan an abilidad ha paghunahuna.”—PROBERBIOS 3:21.
Bangin Maruyagan Mo Liwat
PAKIANA HAN MGA BATAN-ON
Paonan-o Ako Makakapokus?
Kitaa an tulo nga sitwasyon diin mahimo makagwara han imo pokus an teknolohiya ngan kon ano an imo mahihimo basi mas makapokus.
PAGPAMATA!
Okupado Ka ba Hinduro?
Damu yana an nakukurian ha pagbalanse han ira obligasyon ha trabaho ngan ha pamilya. Ano an hinungdan hini? Ano nga mga suhestyon an puydi makabulig ha ira?
PAKIANA HAN MGA BATAN-ON
Ano an Dapat Ko Mahibaroan Mahitungod ha Multitasking?
Madudungan mo gud ba an mga buruhaton nga diri nawawara an pokus?
