E NZA YANKINDA-NKINDA
1 | Tanina o Vimpi Waku
EKUMA DININA DIAMFUNU?
O kondwa kwa nzimbu yovo bwila sumbula dilenda twasa e mpasi muna zingu kia wantu mu mpila zayingi.
-
O bwila e sumbula kutoma kendelekanga wantu ye avo muntu okwamanene kendalala, kuna kulanda, olenda bakama kimbevo.
-
O kondwa kwa nzimbu kulenda wokesa e mpasi muna tupitalu yo lembi kala ye nlongo miafwana mu toma wuka mbevo zayingi.
-
E sumbula yikitulanga e zingu kia wantu se kiampasi muna sumba lekwa bavuidi o mfunu, nze madia ye nlongo.
Nkia Mambu Ofwete Zaya Muna Tanina o Vimpi Waku?
-
Yimbevo yangolo ye ntokani zasaka zilenda kufila mu yambula lunga-lunga o vimpi waku. Muna mpila yayi, olenda kituka se mbevo kikilu.
-
Avo kuvavidi mawuku ko mu kuma kia kimbevo una kiau, e kimbevo kilenda wokela ye olenda nkutu fwa.
-
Ozevo, avo otomene lunga-lunga o vimpi waku, okala wakubama mu baka e nzengo zambote avo mambu mampasi mabwididi.
-
Kiakala vo u mvuama yovo nsukami, olenda vanga diambu muna tanina o vimpi waku.
Adieyi Olenda Vanga Owau?
O nkwa ngangu oteka yindulanga mambu malenda kuntwasila e vonza yo vanga diambu muna venga mo. I diau mpe olenda vanga muna tanina o vimpi waku. O kala nkwa unkete dilenda kusadisa mu venga yimbevo yovo bakama kimbevo kiangolo. Kingana kimosi kivovanga vo, ekolo nlembo ke walwele ko, kanga wo e tenda.
“Okala nkwa unkete dikutusadisanga mu lembi fwasa nzimbu zayingi mu vava mawuku kwa dotolo ngatu sumba nlongo ntangwa zawonso.”—Andreas. a
a E nkumbu zankaka muna Sikama! yayi zasobwa.
Nanga Oyangalela Mpe Malongi Mama
SIKAMA!
Una Olenda Zizidila e Ntokani
Fimpulula e miaka nkanikinu milenda kusadisa muna kulula e ntokani zaku.
