Ukalu weji kulingisanga vatu vahone kupwa vakulikangula.

• Vihuli vyeji kulingisanga vatu vahombe chikuma, kaha nge navahomba halwola lwalusuku chinahase kuvavijisa.

• Ukalu unahase kulingisanga vaka-vipatela vahone kuzakama kanawa vaveji, nakuhona kupwa nawa navitumbo vyakutamo.

• Makava anahase kulingisa vatu vahone kupwa najimbongo jakulanda vyuma vyakulikafwa navyo, vyakufwana nge vyakulya, navitumbo vyakuvakafwa vapwenga vakulikangula kumujimba.

• Misongo yayinene nakuhomba chikuma chinahase kulingisa mutu ahone kushinganyeka kanawa, ngocho nahase kulinga vyuma vize navimulingisa ahone kupwa wakulikangula. Echi chinahase kumulingisa avize chikuma.

• Kachi nge misongo navahona kuyuka, kaha yinahase kuneha ukalu waunene mukuyoya chamutu.

• Kachi nge mutu mwapwa wakulikangula kumujimba, nachimukafwa asakule kanawa vyakulinga numba nge ali muukalu.

• Chamokomoko nachiyoyelo chenu, munahase kulama kanawa mujimba wenu kupwa wakulikangula.

Kakavulu muka-kuzangama eji kumwenanga chimweza ponde kaha eji kulingangako vyuma vimwe mangana alihende kuponde kana. Omu mukiko twatela kulinga kutalisa nakukulikangula chetu. Munahase kukehesako misongo hakupwa vaunyoji. Kulikinga shimbu kanda muvize chapwa chachilemu kuhambakana kuvandamina misongo yimiwane numba mulyuke.

“Kupwa vaunyoji muvyuma vyosena nachitukafwa tukeheseko kuzachisa chikuma jimbongo hakuya kuvipatela nakulanda vitumbo.”—Andreas. *