A zvikarato kutani mhango zvi nga khumba lihanyo la vanhu hi ndlela yo kongoma kutani yo kala kukongoma.

• Loku a vanhu va kumana ni zvikarato zvi maha ku va karateka niku loku va karateka hi cikhati co leha zva olova ku va babya.

• A cikarato co kari ci nga maha ku lomu zvipitali ku tala nguvhu niku zvi maha ku zvi karata a ku kuma mimuri ni zvin’wani.

• A zvikarato zvi khumba a ciyimo ca vanhu ca timali, zvi maha ku zvi karata a ku kuma a zvilo zva tshinya zvi lavekako kasi ku hanya, zvo kota zvakuga zva mavhitamina ni mimuri.

• A mababyi ya hombe ni kukarateka zvi nga khumba a ndlela leyi u pimisako hi yona. Hi kota ya lezvo, u nga nyima ku hlayisa a lihanyo la wena u engetela mababyi.

• Loku a mababyi yo kari ma nga khatalelwi ma nga tshinga ma tlhela ma daya.

• Loku u khatalela khwatsi a lihanyo la wena u ta zvi kota ku maha zviboho zva zvinene a cikhati leci u to kumana ni zvikarato.

• Kani u ni mali kutani a wu nayo, ku na ni zvokari u nga mahako kasi u hlayisa a lihanyo la wena.

Contlhe cikhati zvi kotekako, a munhu wa wutlhari i hlola timhango leti ti nga humelelako a gumesa a maha cokari kasi ku ti vhikela. Lezvo zvonawu zvi nga maheka laha ka lihanyo. A kutala ka zvikhati a kuva ni basiselelo zva hungula ku a munhu a babya kutani ku zva vhalela ku a mababyi ma tshinga. Contlhe cikhati a ku ti vhikela hi wona muri wa hombe.

“Loku hiva ni basiselelo hi tlhela hi hlayisa khwatsi a muti wa hina, hi popara mali ya kuya cipitali ni ya ku xava mimuri”. — Andreas. a