Ukalu unakusoloka mukaye uli nakulingisa vatu vahone kulikangula kumujimba namuvishinganyeka. Vatu vavavulu vaze vanakumona ukalu kana, veji kushinganyekanga ngwavo kaweshi kukakumako. Uno veji kulinganga ngachilihi?

• Vamwe veji kukananga kushinganyeka havyuma vyakulutwe.

• Veka veji kundupukilanga mukunwa wala mangana ngwavo vavulyameko ukalu wavo.

• Vamwe nawa veji kushinganyekanga ngwavo, nakufwa chinawahe kuhambakana kuyoya. Veji kulihulisanga ngwavo: “Mwomwo ika ngwatela kutwalaho kuyoya?”

• Tachikizenu ngwenu ukalu umwe muli nakumona unahase kupwa wakashimbu kakandende, kaha unahase kukuma halwola luze kamwashinganyekeleko.

• Numba nge ukalu kaweshi kukumako, oloze munahase kulingako vyuma vimwe vize navimikafwa mangana mumike muukalu.

• Mbimbiliya yatuhana lutalililo. Yatushika ngwayo ukalu vali nakumona vatu naukakuma.

Mbimbiliya yahanjika ngwayo: “Kanda namulizakamina vyalikumbi lyahameneko, mwomwo likumbi lyahamene nalikapwa navyalyo vyakulizakamina. Likumbi hilikumbi lili naukalu walyo.”—Mateu 6:34.

Kanda kushinganyekanga haukalu wakulutweko, oloze shinganyekenu haukalu muli nawo halikumbi.

Kulizakamina havyuma vize kanda visoloke chinahase kumihombesa chikuma nakumilingisa muhone kupwa nalutalililo lwavyuma vyamwaza navakatulingila kulutwe.

Muka-kwimba jisamu alombele kuli Kalunga ngwenyi: “Mazu ove apwa linongo kumahinji ami, apwa mumunyi mujila yami.” (Samu 119:105) Talenu omwo Mazu aKalunga apwa chikupu linongo kaha nawa mumunyi.

Nge kuli milima, linongo lyeji kutukafwanga tumone mujila twatela kuya. Chochimwe nawa, Mbimbiliya yatwama namangana amwenemwene aze anahase kutukafwa nge tunakusakula kulinga vyuma vyavikalu.

Linongo lyeji kutumunyikilanga mujila nakutukafwa tumone vyuma vili kulutwe. Chochimwe nawa, Mbimbiliya yeji kutukafwa tutachikize ngwetu kulutwe nakukapwa vyuma vyamwaza.