A kukarateka hi kota ya ciyimo ca tiko legi zvi nga khumba munhu hi tlhelo ga miri ni ga kutizwa. Hikwalaho, a vanhu vo tala va mbhelelwa hi kutsumba, va nga woni lezvi zvi nga mahlweni. Hi ndlela muni?

• A vokari ne a va zvi lavi a ku pimisa hi lezvi zvi to maheka cikhatini ci tako.

• A vokari vanwa nguvhu byala kutani ku tirisa madroga kasi va hungula kukarateka.

• A van’wani va chikela laha ka ku va zvi wona na zvi hi chukwana kufa. Va ti wutisa ku: “Ndza ha hanyela yini?”

• A zvikarato zvo kari u kumanako nazvo kuzvilava zva cikhatana niku ni ka cihi cikhati a ciyimo ci nga tshuka ci chukwata.

• Hambu loku a ciyimo ca wena ci nga cici ku na ni zvilo zvo kari u nga mahako kasi ku yimisana ni ciyimo leco.

• A Bhibhiliya gi nyika a kutsumba ka lisine ka ku mbheta zvikarato zva hina.

A Bhibhiliya gi wula lezvi: “Mu nga karatekeli zva mandziko, hakuva a mandziko i tava ni zvikarato zvakwe. A siku gin’we ni gin’wani gi na ni zvikarato zvi ringanako gona.” — Matewu 6:34.

Hanya ga nyamutlha. U nga tsiki a kukaratekela zva mandziko ku ku vhalela a ku maha lezvi u faneleko ku maha nyamutlha.

A ku karateka hi zvilo zvo biha zva ku kuzvilava ne zvi nga ta humelela ku to engetela stress ca wena basi ku tlhela ku mbheta kutsumba ka wena ka zvilo zva zvinene zvi to maheka cikhatini ci tako.

 A mutsali wo kari wa tisimu wa kale i wulile lezvi ka mukhongelo wakwe: ‘A mhaka ya wena i kandiya mikondzweni ya mina, ni kuwonekela le ndleleni ya mina.’ (Lisimu 119:105) A Mhaka ya Nungungulu, a Bhibhiliya, yi tshamisile zvezvo futsi. Wona ku hi ndlela muni?

Loku hi kari hi famba ni wusiku ga munyama, a gezi kutani foki gi nga hi vhuna ku wona laha hi kandzihelako. Hi kufanana, a Bhibhiliya gi hi nyika wusungukati legi gi hi rangelako gi tlhela gi hi vhuna ku maha zviboho zva zvinene ka zviyimo zvo karata.

A cin’wani kambe, a gezi kutani foki gi nga hi vhuna a ku wona lezvi zvi nga mahlweni. Hi kufanana, a Bhibhiliya gonawu gi nga hi vhuna a ku wona lezvi zvi to maheka cikhatini ci tako.