Bukka me Ododo me Baibul

MAN buk me ododo me ada. Kikwanyogi ki i Baibul, buk muywek loyo i wi lobo. Ododo magi titti gin mutimme con i wi lobo cakke i kare ma Lubanga ocako cwec nio wa i karewa-ni. Gitito bene gin ma Lubanga ociko me timone i anyim.

Buk man miyo iniang wiye wiye ngo ma tye i Baibul. Tito lok i kom jo ma kiloko i komgi i Baibul kacel ki jami ma gutimo. Nyuto bene gen madit me kwo ma pe tum i paradic i lobo ma Lubanga omiyo bot dano.

Tye ododo 116 i buk man. Kiketogi i dul aboro. Pot karatac mukwongo me dul acel acel tito wiye wiye gin ma tye i dul meno. Ododo magi kiryeyogi kun lubo kit ma jami magi gutimme kwede kore ki kore i kare macon. Man konyi me ngeyo awene ma jami mogo otimme iye ka kiporo ki jami mukene ma bene gutimme.

Ododo magi kibokogi i leb ma yot. Pol wun lutino matino wubiromo kwanogi wun kikomwu. Wun lunyodo wubinongo ni lutinowu matino gibimaro tutwal ni kikwanigi ododo magi teretere. Ibinongo ni buk-ki tye ki jami ma jo matino wa ki jo madito ducu gimaro.

Kiketo ginacoya me Baibul piny i te ododo acel acel. Kicuko cwinyi me kwano but Baibul ka ma ododo magi oa iye. Ka ityeko kwano ododo moni, ci inyam lapeny ma gitye i nge ododo 116 wek inen ka i twero miyo lagamme ki wi.