WOMI nɛ ɔ mi sane ɔmɛ ji anɔkuale. A je kɛ je womi nɛ pe kulaa ngɛ je ɔ mi, nɛ ji Baiblo ɔ mi. E mi munyu ɔmɛ ma de mo je ɔ mi yinɔ sanehi kɛ je benɛ Mawu je ní bɔmi sisi kɛ ba su wa be nɛ ɔ mi. E maa sɛɛ mo níhi nɛ Mawu wo si kaa e maa pee hwɔɔ se po he ní.

Womi nɛ ɔ maa tsɔɔ mo níhi nɛ ngɛ Baiblo ɔ mi. E maa sɛɛ mo Baiblo ɔ mi nimli kɛ níhi nɛ a tsu. E tsɔɔ neneene wami ngɛ́ paradeiso zugba a nɔ he hɛ nɔ kami kpakpa nɛ Mawu kɛ ma ha nimli ɔ hu mi.

Sanehi 116 lɛ ngɛ womi nɛ ɔ mi. A gba mɛ kɛ wo kuuhi kpaanyɔ mi. Mi gbami tsuaa mi gbami hɛɛ bafa kake ngɛ e sisije nɛ́ tsɔɔ sanehi nɛ o maa na ngɛ mi ɔ nya kpiti. A to sane ɔmɛ a nya kaa bɔnɛ a ya nɔ ngɛ yinɔ sane mi ɔ. Enɛ ɔ maa ye bua mo konɛ o le be mi nɛ ní komɛ ba ngɛ yinɔ sane mi, kɛ tsakpa nɛ́ ngɛ a kɛ ní kpahi hu nɛ ya nɔ a kpɛti.

A sɛɛ sane ɔmɛ kɛ gbi nɛ mi wɛ́. Nyɛ jokuɛwi, nyɛ kpɛti nihi fuu ma nyɛ maa kane womi ɔ ngɛ nyɛ dɛ he. Nɛ nyɛ fɔli hu nyɛ maa na kaa, nyɛ bimɛ wawi a bua maa jɔ he kaa nyɛ maa kane sane nɛ ɔmɛ ha mɛ daa. O maa na kaa jokuɛwi kɛ nikɔtɔmahi tsuo ma nya womi nɛ ɔ he.

A tsɛ Baiblo ngmamihi ngɛ ní kasemi tsuaa ní kasemi nyagbe. Wa ngɛ mo he wami woe kaa o kane Baiblo ngmamihi nɛ tsɔɔ he nɛ a je ní kasemi ɔmɛ kɛ je ɔ. Ke o gbe ní kasemi ɔ eko tsuaa eko nya a, mo susu sane bimihi nɛ a ngɛ Ní kasemi 116 nyagbe ɔ he konɛ o bɔ mɔde kaa o ma kai heto ɔmɛ.