FLUWA nga i nun ndɛ’m be ti nanwlɛ. Be fin Biblu’n m’ɔ le ɲrun tra mɛn’n nun fluwa ngba’n, i nun. Kɛ Ɲanmiɛn boli ninnge’m be yilɛ’n bo lele m’ɔ́ fá jú andɛ yɛ’n, i su ndɛ yɛ be kɛn i fluwa nga nun ɔn. Ɔ kan like nga Ɲanmiɛn sunnzun kɛ ɔ́ yó i e ɲrun lɔ’n, i ndɛ wie.

Ninnge wunmuan nga be o Biblu’n nun’n, be ndɛ yɛ fluwa nga kan ɔn. Ɔ kan sran nga be o Biblu’n nun’n, ɔ nin be sa nga be yoli’n, be ndɛ. I kusu, ɔ kan mɛn klanman’n nun anannganman nguan mɔ Ɲanmiɛn maan sran’m be wla’n o su’n, i ndɛ wie.

Ndɛ tre (116) yɛ be o fluwa’n nun ɔn. Be bubu fluwa’n nun akpasuaakpasua sɔ mɔcuɛ. Kwlaa naan b’a kan akpasua kun nun ndɛ’n, fluwa’n i bue nga be dun mmua to i’n, i nun’n, be bo ndɛ’n i kpɔlɛ. Wafa nga sa’m be fa yoli lɔngɔ su’n, i su yɛ be niannin be kannin ndɛ mun ɔn. I sɔ’n uka e naan y’a si sa sɔ’m be yolɛ blɛ’n.

Aniɛn pɔpɔ nun yɛ be kannin sa sɔ’m be ndɛ ɔ. Ba kanngan mun, amun bɔbɔ amun nun sunman lika kwla kanngan nun. Siɛ nin niɛn mun, amún kwlá wún kɛ amun mma kanngan’m bé kló kɛ be kanngan ndɛ sɔ’m be nun kle be, naan be kan flan nun kle be. Ndɛ sɔ’m be su flanman be le. Amún wún kɛ i ba kanngan o, i sran kpɛnngbɛn o, fluwa sɔ’n i nun ndɛ’n ɔ́ yó be fɛ kpa.

Biblu’n nun ndɛ mma nga sa sɔ’m be fin nun’n, be klɛ be fluwa nɲa’n i ja ngua lɔ, maan amun kanngan be nun. Kɛ amun ko wie ndɛ tre kun nun kanngan’n, amun nian i su kosan nga be o ndɛ tre 116 i sin lɔ’n. Kpɛkun amun nian naan sɛ be su tɛlɛ’n kwla ka amun klun o.