Bibulu maanaw gafe

MAANA minnu fɔlen bɛ nin gafe kɔnɔ, olu bɛɛ ye tiɲɛ ye. Diɲɛ kɔnɔ, gafe nafamaw bɛ yen. Nka min nafa ka bon ni tɔw bɛɛ ye, o ye Bibulu ye. Maana minnuw bɛ nin gafe kɔnɔ, olu bɔra Bibulu kɔnɔ. U bɛ daminɛ tuma min na Ala ye diɲɛ da, ani u bɛ taa a fɛ fo ka na se bi ma. Ala ye layidu ta ko a bɛna min kɛ don nataw la, maanaw bɛ kuma hali olu kan fana.

Nin gafe b’i dɛmɛ ka faamuyali dɔ sɔrɔ Bibulu kan. Mɔgɔ minnu kofɔlen bɛ Bibulu kɔnɔ, a bɛ kuma olu kan. O mɔgɔw ye fɛn minnu kɛ, a bɛ o fana ɲɛfɔ. Ala ye jigiyaba min di mɔgɔw ma, n’o ye ka ɲɛnamaya kɛ kudayi alijinɛ kɔnɔ dugukolo kan yan, gafe bɛ kuma o fana kan.

Maana 116 de bɛ nin gafe kɔnɔ. An ye o maanaw tila ka kɛ yɔrɔ segin ye. Yɔrɔ bɛɛ bɛ daminɛ ni ɲɛfɔli surun ye sɛbɛnfura ɲɛ kelen kan walisa k’a jira min bɛ fɔ a kɔnɔ. Maanaw tugulen bɛ nin gafe kɔnɔ. O la, o bɛna i dɛmɛ k’a faamu ko, ko minnu fɔra maana 4nan kɔnɔ, o kɛra ka kɔn maana 5nan ɲɛ. I n’a fɔ 54nan kɔnna 88nan ɲɛ.

Maanaw ɲɛfɔlen bɛ cogo min na, denmisɛnw, aw caman bɛna se ka maanaw kalan aw yɛrɛ ye. Bangebagaw, aw bɛna a ye ko hali ni aw ye maanaw kalan aw ka den fitininw ye siɲɛ caman, o bɛna diya u ye tuma bɛɛ. U tɛna sɛgɛn maanaw lamɛnni na. Aw bɛna a ye ko fɛn duman caman bɛ nin gafe kɔnɔ minnu bɛna diya denmisɛnninw ni mɔgɔkɔrɔbaw ye.

Bibulu tɛmɛsiraw dilen bɛ maana kelen-kelen bɛɛ laban na. Maanaw bɔra o Bibulu tɛmɛsiraw de kɔnɔ. An bɛ dusu don aw kɔnɔ, aw ka olu kalan. N’i tilala maana dɔ la, i ka ɲinikaliw lajɛ o ko la min bɛ sɔrɔ maana 116 kɔfɛ ani ɲini ka jaabiw sɔrɔ.