HI cu a hmaan taktak mi tuanbia cauk a si. Hi tuanbia hna cu vawlei cung i a ṭha bik mi cauk, Baibal chung in lak mi lawngte an si. Hi tuanbia hna nih Pathian nih thil ser hram a thoknak in kanmah chan tiang a cang lengmang mi vawlei tuanbia kha an hngalhter lai. Hmai lei ah kan tuahpiak hna lai tiah Pathian nih bia a kam mi thil hna kong zong an chimh fawn lai.

Hi cauk nih Baibal cu zeidah a si ti mi ruahnak an pek lai. Baibal cauk chung i minung hna le an tuah mi thil kong kha a chim leng ah, Pathian nih minung sin ah a pek mi paradis vawlei i zungzal nunnak ruahchannak kong zong a chim ve.

Hi cauk chung ah hin tuanbia 116 a um. Annih cu ṭhen riat ah ṭhen an si. Ṭhen khat cio i hmasa bik cahmai ah khi ṭhen chung i a um mi kong kha a tawinak in ṭial a si. Tuanbia hna cu an rak si nak ning in aa changchang tein ṭial an si. Mah nihcun thil pakhat cu a dang thil hna he aa tlai in, zeitikahdah a rak tlun ti hngalh awk ah an bawmh hna lai.

Tuanbia hna cu holh fawi tete in ṭial an si. Ngakchia hna, nanmah tein nan rel khawh ko hna lai. Nannih nu le pa hna zong nih ngakchia hna cu hi tuanbia hna kha atu le atu relpiak an duh ti nan hngalh ve lai. Hi cauk chung ah ngakchia ca he upa ca he a ṭha ngai ngai mi kong tampi aa tel ti nan hmuh lai.

Tuanbia kip a donghnak ah a kong ṭial mi Baibal cang hna ṭial an si. Tuanbia pawl kan ṭial tik i kan cherhchan mi Baibal cang hna kha rel chih lengmang awk ah kan in forh ve.