EMI edi n̄wed mbụk akpanikọ. Ẹsio mmọ ẹto n̄kpon n̄kan n̄wed ke ererimbot, kpa Bible. Mme mbụk emi ẹnọ fi mbụk ererimbot tọn̄ọde ke ini Abasi ọkọtọn̄ọde ndibot n̄kpọ tutu osịm eyo nnyịn. Mmọ ẹtịn̄ n̄ko ẹban̄a se Abasi ọn̄wọn̄ọde ndinam ke idem ini iso.

N̄wed emi anam an̄wan̄a fi ofụri se Bible adade aban̄a. Enye etịn̄ aban̄a mme owo eke Bible ye se mmọ ẹkenamde. Enye owụt n̄ko akwa idotenyịn nsinsi uwem ke paradise isọn̄ oro Abasi ọnọde mme owo.

Mme mbụk 116 ẹdu ke n̄wed emi. Ẹtịm mmọ ẹmi ẹdọn̄ ke ikpehe itiaita. Page kiet ke ntọn̄ọ ikpehe kiet kiet etịn̄ ibio ibio se idude ke ikpehe oro. Ẹwet mbụk ke udịm ẹtiene nte n̄kpọ ẹketịbede ke mbụk. Emi an̄wam fi ndidiọn̄ọ ke ebuana ye mme n̄kpọ ntịbe eken, ini mme n̄kpọ ẹketịbede ke mbụk.

Ẹtịn̄ mme mbụk emi ke usem ememde. Ediwak mbufo n̄kpri nditọ ẹyekeme ndikot mmọ ke idem mbufo. Mbufo mme ete ye eka ẹyekụt ete ke n̄kpri nditọ mbufo ẹyedara ẹkot, ẹfiak ẹkot mme mbụk emi ẹnọ mmọ. Mbufo ẹyekụt ete ke n̄wed emi ọdọn̄ọ ediwak n̄kpọ ẹnemde ọnọ n̄kpri ye ikpọ owo ukem ukem.

Ẹnọ mme itie n̄wed Bible ke utịt mbụk kiet kiet. Ẹsịn udọn̄ enọ mbufo ndikot mme itie ke Bible ẹsiode mme mbụk emi ẹto. Ke ama okokụre mbụk kiet kiet, fiak dụn̄ọde mme mbụme ukpepn̄kpọ mbụk oro ke utịt Mbụk 116 nyụn̄ domo nditi mme ibọrọ mmọ