OQO na ivola ni italanoa dina. E tauri mai na ivola uasivi duadua, na iVolatabu. Na italanoa oqo e baleta tiko na itukutuku kei vuravura, mai na gauna e tekivu bulibuli kina na Kalou me yacova sara mai nikua. E tukuna tale ga na veika e yalataka na Kalou me baleta na veigauna se bera mai.

Na ivola oqo ena tukuna vei iko na veika e baleta na iVolatabu. E tukuni ira na tamata ena iVolatabu kei na veika era cakava. E vakaraitaka tale ga na inuinui ni bula tawamudu ena parataisi e vuravura sa yalataka tu na Kalou vua na tamata.

E 116 taucoko na kena italanoa. E wasei vakawalu na italanoa kece. Na imatai ni tabana ena veiwase yadua e vakamacalataka vakalekaleka na ka o na wilika ena wase oya. E tuvai veitarataravi na veika a yaco. Sa rawa kina mo kila na kedra dui veitaravi.

E vakayagataki ga na vosa kilai rawarawa. E levu sara vei kemuni na gone oni na wilika rawa. Oni na raica tale ga na itubutubu nira na vinakata na lalai me wiliki wasoma vei ira. Sa tu ena ivola oqo na veika oni taleitaka na sa qase cake kei kemuni na gone.

E volai tu ena icavacava ni italanoa yadua na veitikinivolatabu e yavutaki kina na italanoa. Tovolea mo wilika na iwase ni iVolatabu oqori. Ni o wilika oti e dua na italanoa, raica tale ga na kena taro ni oti na italanoa 116.