Tärä tikwe tä blite Bibliabätä

TÄRÄ nebätä kukwe kira namani bare metre ye tikani. Biblia, tärä bäri ütiäte yebätä kukwe ne dianinkä. Ngöbökwe jondron sribebare ye ngwane dreta nemen bare nükebe kä nengwane ye rabai gare mäi. Ngöbö tö dre nuaindi kä ja känenkäre yete ye tä niere arato.

Kukwe tikani Bibliabätä ye tärä ne käkwe mikai gare mäi. Nitre kädekateta Bibliabätä aune dre nuainbare kwetre ye tä mike gare. Kä tibien sribei bä nuäre käbämikata Ngöbökwe, känti nitre käkwe nünain käre ye mikata gare kwe arato.

Kukwe kira namani bare kädrieta 116 tärä nebätä. Tä ükaninte keta kwä jatäri. Dre kädrieta kukwe keteitire keteitire yebätä, ye mikata gare kukwe braibebiti página kena yekänti. Kukwe kira namani bare jatäri ye erere tikani. Ne käkwe mä dimikai mike gare jai, ñongwane kukwe keteitire keteitire ye namani bare.

Kukwe namani bare ye mikata gare kukwe nuäre rükadre gare yebiti. Monsotre kia kwati rabai ñäke akwlebätä. Kukwe namani bare yebätä monsotre kia törbai nitre rüne tuai ñäke bati bobu jai. Tärä nebätä kukwe keta kabre ütiäte tikani, monsotre bati aune nitre umbre kräke.

Kukwe keteitire keteitire namani bare kädrieta yekänti mrä texto Bibliabätä tä tikani. Kukwe kira namani bare tä tikani Bibliabätä yekänti mä nübaita ñäke. Mäkwe ñäkä täte kukwe kira ketare ketare yebätä angwane, kukwe kira 116 ye bitikäre kukwe ngwantarita kukwe kira yekrä ye mäkwe mika ñärärä aune kukwe mikani gare ye mäkwe ngwan törö jai.