INAI buka lalonai idia noho sivarai ibounai be momokani. Idia be tanobada ena buka ibounai ia hereaia bukana, Baibel, amo idia abia. Idia be Dirava ese tanobada ia karaia negana amo ema bona hari idia sivarailaia. Nega vaira ai Dirava ese do ia karaia gaudia idia herevalaia danu.

Inai buka amo Baibel do oi dibaia namonamo. Baibel ese ia gwauraia taudia edia sivarai bona idia karaia gaudia ia gwauraia. Dirava ese taunimanima dekenai ia henia helarona, tanobada paradaisona ai do idia mauri hanaihanai ia hahedinaraia danu.

Inai buka lalonai sivarai idauidau 116 idia noho. Idia be kahana 8 dekenai ai haridia. Kahana ta ta edia matamana ai, rau ta ese unai kahana ena sivarai idauidau ia gwauraia sisina. Sivarai ibounai be idia vara nega hegeregerena ai idia hedinarai. Unai amo do oi diba histori lalonai unai gaudia be edena negai idia vara.

Sivarai ibounai be auka lasi dalanai idia torea. Umui natudia maragidia ese umui duahia diba. Umui tama sina do umui davaria, emui natudia do idia moale bada bema inai sivaraidia be idia dekenai umui duahia loulou. Taunimanima badadia bona matamatadia ese inai buka do idia moalelaia danu.

Sivarai ta ta edia dokonai, Baibel ena siri haida idia torea. Umui ai hagoadaia unai Baibel siridia umui duahia totona, badina inai sivarai ibounai be unai siri amo ai abia. Sivarai ta umui duahia haorea neganai, ena henanadai be Sivarai 116 ena murinai umui itaia bona haere umui laloa.