Embo randje romahungi wOmbeibela

Omambo wokomeho

OMAHUNGI nge ri membo ndi ouatjiri. Oyo ya za mOmbeibela, ndi ri embo enenenene mouye. Omahungi ngo maye ku pe ekuruhungi rouye okuza ku indu Mukuru tja uta okumema oviṋa ngandu koruveze rwetu. Oyo wina ye hungira ohunga naimbi Mukuru mbya kwizika okukatjita moruyaveze.

Embo ndi mari ku vatere okutjiwa kutja Ombeibela i honga tjike. Oro ri hungira ohunga novandu voruveze rwOmbeibela noviṋa mbi va tjita. Oro wina ri hungira ohunga nomaundjiro omawa Mukuru nga yandja kovandu, omaundjiro nga owomuinyo waaruhe moparadisa kombanda yehi.

Membo ndi mu na omahungi 116. Oyo ya haṋwa motupa hambondatu. Pomautiro worupa aruhe pe nomukuma mbu mau handjaura ousupi kutja mu na tjike morupa ndo. Omahungi nga ye ri mongongorasaneno otja ovitjitwa tji vya kayenda mekuruhungi. Ihi matji ku vatere okurihonga kutja oruṋe, tji wa sasaneke novitjitwa vyarwe, oviṋa tji vya tjitwa mekuruhungi.

Omahungi nga ya serekarerwa meraka epupu. Otjingi tjeṋu imba ovaṱiṱi mamu yenene okurilesera omahungi nga oveni. Kovanene vovanatje, eṋe mamu kamuna kutja ounatje weṋu mau katjaterwa tjinene tji mamu u lesere omahungi nga povikando ovingi. Eṋe mamu kamuna kutja membo ndi mu noviṋa ovingi oviwa kovanatje na kovanene.

Omatjangwa kukwa zikamena omahungi nga ya tjangwa komaandero wehungi arihe. Ove mo tunduzwa okulesa otupa twOmbeibela kukwa zikamena omahungi nga. Tji wa mana okulesa ehungi, twende komapuriro wokukonḓonona nge ri komaandero wEhungi 116. Tara kutja mo yenene okuzira omapuriro ngo.