Tiqsiḍin n Wedlis Iqedsen

Introduction

WAGI d adlis neɣ ţ-​ţaktabt n teqsiḍin yeḍran s ṣṣeḥ. Tiqsiḍin-​a kkant-​ed seg yiwen wedlis yugaren akk wiyaḍ, Adlis Iqedsen. Tiqsiḍin-​agi a k-​d-​ḥkunt ayen yeḍran seg wasmi i d-​yexleq Ṛebbi ddunit armi d ussan-​nneɣ. A k-​d-​hedṛent daɣen ɣef wayen yewɛed Ṛebbi a t-​ixdem ɣer zdat.

Taktabt-​agi a k-​d-​tessken kra n leḥwayeǧ yellan deg Wedlis Iqedsen. A k-​d-​tehdeṛ ɣef yemdanen iɣef i d-​immeslay Wawal n Ṛebbi d wayen i xedmen. A k-​d-​tehdeṛ daɣen ɣef usirem ameqran i gefka Ṛebbi i yemdanen: tudert n dayem ɣef lqaɛa ara yuɣalen d lǧennet.

Llant 116 n teqsiḍin di tektabt-​agi. Nefreq-​itent ɣef tmanya yeḥricen. Mkul aḥric ad yebdu s kra n lehduṛ ara d-​yemlen acu ara naf deg-​s. Tiqsiḍin-​agi msetbaɛent akken i ḍrant di ttarix. Annect-​a a k-​iɛiwen aţ-​ţeẓreḍ melmi i ḍrant di ttarix nutenti ţ-​ţedyanin nniḍen iɣer cuddent.

Tiqsiḍin-​a urant s tmeslayt isehlen i lefhama. Ay imecṭaḥ, aţ-​ţizmirem aţ-​ţeɣrem tiqsiḍin-​agi weḥd-​nwen. Ma d kunwi ay imawlan, aţ-​ţwalim lfeṛḥ n warraw-​nwen imi qqaren rennun tiqsiḍin-​agi. Aţ-​ţafem aṭas n leḥwayeǧ deg wedlis-​agi ara iɛeǧben ama i imecṭaḥ ama i imeqranen.

Ţţunefken-​d yefyar n Wedlis Iqedsen ɣer taggara n mkul taqsiṭ. Ɣur-​wat aţ-​ţeqqimem ur teqqarem ara ifyar-​agi n Wawal n Ṛebbi iɣef i reṣṣant teqsiḍin-​a. Mi tfukkem leqraya n yiwet n teqsiṭ, ssenqdet isteqsiyen icudden ɣur-​es yellan deffir n teqsiṭ tis 116, yerna ɛerḍet a d-​tafem leǧwab mebla ma tmuqlem.