YĨĨ nĩ ĩvuku ya ngewa sya w’o. Syumĩtw’e Mbivilianĩ, ĩvuku yĩla ya vata vyũ kũũ nthĩ. Ngewa isu syĩkũelesya isitoli ya nthĩ kuma yĩla Ngai wambĩĩe kũmba nginya ĩvinda yitũ. O na nĩsyĩkũkũelesya maũndũ ala Ngai wathanĩte ũkeka ĩvinda yĩla yũkĩte

Ĩvuku yĩĩ yĩkũelesya ĩũlũ wa Mbivilia. Yĩelesya ĩũlũ wa andũ ala mawetetwe Mbivilianĩ na maũndũ ala meekie. O na nĩyĩonanany’a wĩkwatyo mũseo ũla Ngai ũnengete andũ wa kwĩthĩwa na thayũ ũtathela nthĩnĩ wa nthĩ ya valatiso

Ĩvuku yĩĩ yĩna ngewa 116. Ngewa isu ivangĩtwe ilungu nyaanya. Mbee wa kĩla kĩlungu, ve ĩthangũ yĩeleetye kwa ũkuvĩ maũndũ ala me kĩlungunĩ kĩu. Ngewa isu iatĩanĩe o ũndũ maũndũ asu meekĩkie nthĩnĩ wa isitoli. Mũvango ũsu nũkũũtetheesya kũmanya maũndũ asu meekĩkie ĩndĩĩ nthĩnĩ wa isitoli, kwa kũmasianĩsya na maũndũ ala angĩ.

Ngewa isu ieleetw’e kwa kĩthyomo kĩvũthũ. Aingĩ menyu inywĩ syana nini mũkeethĩwa mũtonya kwĩsomea ngewa isu. Na inywĩ asyai mũkoona kana syana syenyu ila nini ikatanĩa kũsomewa ngewa isu ĩngĩ na ĩngĩ. Mũkoona kana ĩvuku yĩĩ nĩyendeeasya mũno syana o na andũ aima.

Maandĩko ma Mbivilia nĩmonanĩtw’e ĩtina wa kĩla ngewa. Nĩmũũkũlw’a mũsome maandĩko ma Mbivilia vala ngewa isu syumĩtwe. Wamina kũsoma ngewa, tata kũsũngĩa makũlyo ma kwĩmanyĩsya ma ngewa ĩsu ala me ĩtina wa ngewa ya 116.

Maandĩko ma Mbivilia ala me ĩvukunĩ yĩĩ maeleetw’e kwa nzĩa ĩtonya kũeleeka kwa ũvũthũ. Maeleetw’e ũu nĩ kana syana nini itonye kũmaelewa. Maandĩko ala me ĩtina wa kĩla ngewa meonany’a vala ngewa ĩsu ĩkwatĩkanaa Mbivilianĩ.