CHIXJUNIL li tzʼiibʼanbʼil saʼ li tasal hu aʼin, kikʼulmank ut isinbʼil chaq saʼ li Santil Hu. Saʼebʼ li tzolom naxchʼolobʼ chanru kixyoobʼtesi li Yos chixjunil li kʼaʼaq re ru ut chanru li qayuʼam anaqwan. Naxchʼolobʼ ajwiʼ kʼaru tixbʼaanu li Yos saʼ li kutan chaalel.

Li tasal hu naxye kʼaru chaabʼil naʼlebʼ wank saʼ li Santil Hu. Naxye kʼaru xeʼxbʼaanu chaq ebʼ li poyanam. Naxye ajwiʼ naq ebʼ li poyanam naru teʼwanq xyuʼam chi junelik saʼ li Sahilal Naʼajej arin saʼ Ruuchichʼochʼ.

Chisaʼ li tasal hu aʼin wank 116 chi tzolom ut tusbʼil saʼ waqxaqibʼ tasal. Saʼ xtiklajik li junjunq chi tasal naxye bʼayaq chirix kʼaru naʼaatinak li tasal aʼin. Ebʼ li tzolom tustuukebʼ ru joʼ chanru kikʼulmank chaq. Chi joʼkan taatzol joqʼe kikʼulmank chixjunil aʼin.

Moko chʼaʼaj ta xtawbʼal ru ebʼ li junjunq chi tzolom. Ebʼ li kokʼal teʼruuq rilbʼal li hu aʼin. Ebʼ li naʼbʼej yuwaʼbʼej teʼxkʼe reetal naq ebʼ li xkokʼal sahaqebʼ saʼ xchʼool chi rabʼinkil naabʼal sut ebʼ li tzolom aʼin. Saʼ li tasal hu aʼin wank naabʼal chaabʼil naʼlebʼ, joʼkan naq yiibʼanbʼil choʼq re chixjunilebʼ li qas qiitzʼin.

Ebʼ li junjunq chi tzolom isinbʼil chaq saʼ li Santil Hu. Joʼkan naq, tento naq taasikʼ ebʼ li raqal li Santil Hu li wank saʼebʼ li tzolom. Naq taachoy rilbʼal jun li tzolom chaawil ebʼ li patzʼom re naq taanaw xsumenkil. Chixjunil li patzʼom taataw chirix li tzolom 116.