UNO ke buku wa mashimikila a kine. Beafumya mu buku waya bingi nkuwa, utelwa’mba Baibolo. Ano mashimikila asa kukubula byamwekele kufuma kimye Lesa kyo alengele ntanda kufika ne mu ano moba. Kabiji aamba ne pa bintu Lesa byo alaya kuba kulutwe na lwendo.

Uno buku usa kukubula bintu byonse byaambiwapo mu Baibolo. Waamba pa bantu baambiwapo mu Baibolo ne bintu byo baubile. Kabiji umwesha ne luketekelo lwa bumi bwa myaka ne myaka panopantanda bo apana Lesa ku bantu bonse.

Mu uno buku muji mashimikila 116. Beatanchika mu bipungu bitanu na bisatu. Byambo biji ku ntendekelo ya kipungu kimo kimo byalumbululako pacheche biji mu kyokyo kipungu. Mashimikila atanchikwa mu ndonda kwesakana na bintu byo byaubiwe ku kala. Kino kisa kukukwasha kuyuka bintu bikwabo byo byakwatankana na bintu byaubiwe ku kala.

Mashimikila anembewa mu mulaka wapela kumvwa. Anweba bakyanyike bavula mukakonsha kwiatanga bunke bwenu. Anweba bansemi mukatana kuba’mba baana benu ba bacheche bakomvwanga bingi bulongo kwibatangilanga ano mashimikila kimye kyonse. Mukatana kuba’mba uno buku bamutemwa bingi ku banyike ne ku bakulumpetu.

Binembelo bya mu Baibolo biji ku mpelo ya jishimikila jonse. Mwatundaikwa kutanga bino byepelo bya mu Baibolo pafuma ano mashimikila.