ໜັງສືຂອງຂ້ອຍກ່ຽວກັບເລື່ອງໃນພະຄຳພີໄບເບິນ
ໜັງສືຂອງຂ້ອຍກ່ຽວກັບເລື່ອງໃນພະຄຳພີໄບເບິນ
ນີ້ຄືໜັງສືກ່ຽວກັບເລື່ອງຊຶ່ງເປັນຄວາມຈິງ. ເລື່ອງທັງຫຼາຍເຫຼົ່ານີ້ເອົາມາຈາກພະຄຳພີໄບເບິນ ໜັງສືສຳຄັນທີ່ສຸດໃນໂລກ. ເລື່ອງຕ່າງໆຈະແຈ້ງໃຫ້ເຈົ້າຮູ້ເຖິງປະຫວັດສາດຂອງໂລກຕັ້ງແຕ່ເມື່ອພະເຈົ້າເລີ່ມຕົ້ນສ້າງຈົນເຖິງສະໄໝຂອງເຮົາ. ນອກຈາກນີ້ຍັງໄດ້ບອກໃຫ້ຮູ້ກ່ຽວກັບສິ່ງທີ່ພະເຈົ້າສັນຍາໄວ້ວ່າຈະກະທຳໃນອະນາຄົດ.
ໜັງສືເຫຼັ້ມນີ້ຈະໃຫ້ເຈົ້າຮູ້ວ່າພະຄຳພີເວົ້າເຖິງເລື່ອງຫຍັງແດ່. ໜັງສືເຫຼັ້ມນີ້ບອກເຖິງຄົນໃນສະໄໝພະຄຳພີແລະສິ່ງທີ່ພວກເຂົາໄດ້ເຮັດ. ໜັງສືເຫຼັ້ມນີ້ສະແດງໃຫ້ຮູ້ອີກດ້ວຍເຖິງຄວາມຫວັງອັນຍິ່ງໃຫຍ່ທີ່ພະເຈົ້າໄດ້ໃຫ້ແກ່ມະນຸດເຮົາກ່ຽວກັບຊີວິດອັນຕະຫຼອດໄປເປັນນິດໃນອຸດທະຍານເທິງແຜ່ນດິນໂລກ.
ໃນໜັງສືເຫຼັ້ມນີ້ມີ 116 ເລື່ອງ. ເລື່ອງເຫຼົ່ານີ້ຈັດເປັນແປດພາກ. ໜ້າເລີ່ມຕົ້ນຂອງແຕ່ລະພາກຈະບອກໃຫ້ຮູ້ຢ່າງສັ້ນໆເຖິງສິ່ງທີ່ຢູ່ໃນພາກນັ້ນ. ເລື່ອງເຫຼົ່ານີ້ຈະປາກົດຢູ່ຕາມລຳດັບຕາມເຫດການທີ່ໄດ້ເກີດຂຶ້ນໃນປະຫວັດສາດ. ທັງນີ້ຈະຊ່ວຍເຈົ້າໃຫ້ຮູ້ເຖິງສິ່ງຕ່າງໆເກີດຂຶ້ນເມື່ອໃດໃນປະຫວັດສາດ ແລະມີການກ່ຽວຂ້ອງກັນຢ່າງໃດກັບເຫດການອື່ນໆ.
ເລື່ອງເຫຼົ່ານີ້ໄດ້ເລົ່າເປັນພາສາງ່າຍໆ. ຫຼາຍຄົນໃນພວກເຈົ້າທີ່ຍັງເປັນຫນຸ່ມນ້ອຍຈະສາມາດອ່ານເລື່ອງເຫຼົ່ານີ້ໄດ້ດ້ວຍຕົນເອງ. ທ່ານຜູ້ທີ່ເປັນພໍ່ແມ່ຈະພົບວ່າລູກນ້ອຍໆຂອງທ່ານຍິນດີທີ່ຈະໃຫ້ອ່ານເລື່ອງເຫຼົ່ານີ້ໃຫ້ເຂົາຟັງຊ້ຳແລ້ວຊ້ຳອີກ. ທ່ານຈະພົບວ່າໜັງສືເຫຼັ້ມນີ້ບັນຈຸເລື່ອງທີ່ມີປະໂຫຍດຫຼາຍສຳຫຼັບຜູ້ຫນຸ່ມນ້ອຍແລະຜູ້ໃຫຍ່ດ້ວຍ.
ມີການນຳຂໍ້ພະຄຳພີຂຶ້ນມາອ້າງອິງໄວ້ຕອນທ້າຍຂອງແຕ່ລະເລື່ອງ. ຂໍສະໜັບສະຫນູນທ່ານອ່ານຂໍ້ພະຄຳພີເຫຼົ່ານີ້ຊຶ່ງເລື່ອງຕ່າງໆໄດ້ຍຶດເປັນຮາກຖານ. ເມື່ອອ່ານເລື່ອງຈົບໃຫ້ທົບທວນຄຳຖາມສຳລັບການສຶກສາຂອງເລື່ອງນັ້ນເຊິ່ງຢູ່ທາງຫຼັງເລື່ອງທີ 116 ແລະພະຍາຍາມຕອບຄຳຖາມ.
