DINO i dibuku dya mānga ya bine. I milupulwe mu Bible, dibuku dya mvubu kupita mabuku onso a pano pa ntanda. Ino mānga ikuyukija myanda ilongekele pano pa ntanda, tamba kitatyi kyāshilwile Leza kupanga kufika ne mu kino kyetu kitatyi. Kadi ilombolanga ne myanda ilaile Leza kulonga mu mafuku āya kumeso.

Dino dibuku disa kukuyukija mulangwe wimanine’po Bible yense. Disambilanga pa bantu batelelwe mu Bible ne myanda yobālongele. Kadi dilombolanga ne lukulupilo lukatampe lupelwe bantu na Leza, lwa kwikala na būmi bwa nyeke mu paladisa pano pa ntanda.

Mu dino dibuku mudi mānga 116. I myabanibwe mu bipindi mwanda. Paje wa ku ñanjilo kwa kipindi ne kipindi ulombolanga mu kīpi myanda īsambilwe’po mu kine kipindi’kya. Mānga i mīlonde mungya bitatyi byālongekele myanda ibangilwe. Kino kikakukwasha uyuke kitatyi kyālongekele myanda kampanda kudingakana na mikwabo.

Mānga i mifumikwe mu muneneno upēla. Bankasampe bavule umbukata mwenu bakokeja kwiitanga abo bene. Banwe bambutwile mukajingulula’mba benu bana banuke bakasangela ino mānga shi mwibatangila’yo kitatyi ne kitatyi. Mukamona’mba dino dibuku dikasangaja banuke ne batame bene kumo.

Bisonekwa bya mu Bible i bitelwe ku mfulo kwa mānga ne mānga. Tubakukankamika utange bino bipindi bya mu Bible bimanine’po ino mānga.