AQEJU txʼolbʼabʼil ateʼkux tuj uʼj lu axixqe. Ma chi jatz toj uʼj nimxix toklen twitz tkyaqil txʼotxʼ, aju Tuʼjil Tyol Dios. Aqe txʼolbʼabʼil ateʼkux tuj uʼj lu nchi yolin tiʼj atxix tej tkubʼ tbʼinchen Dios tkyaqil ex nul toj qqʼijlal jaʼle. Ax ikx in tzaj kyqʼamaʼn qejo txʼolbʼabʼil lu, aju o tzaj ttziyen Dios tuʼn tbʼant tuʼn tuj ambʼil tzul.

Aju uʼj lu kʼonil tiʼja tuʼn tel tnikʼa tiʼj junjun tiʼchaq tkuʼx toj Tyol Dios. In yolin kyiʼj xjal ateʼkux tuj Tyol Dios ex tiʼjju kubʼ kybʼinchen. Ax ikx ntzaj tyekʼen aju tbʼanelxix o tzaj ttziyen Dios kye xjal, aju tuʼn kyanqʼin te jumajx tuj jun tbʼanel najbʼil te tzalajbʼil tzalu twitz Txʼotxʼ.

Ateʼ 116 txʼolbʼabʼil toj uʼj lu. Nchi kubʼ paʼn te wajxaq kʼloj. Teyelex te junjun kʼloj txʼolbʼabʼil at jun t-xaq jatumel tkuʼx chʼin tqanil tiʼj aju tkuʼx toj kʼloj aju. Toj ttxolil atqeʼ txʼolbʼabʼel ik tzeʼnj bʼaj tuj ambʼil ojtxi. A jlu kʼonil tiʼja tuʼn tel tnikʼa toj alkye ambʼil ikʼ tkyaqil jlu.

Ma chi jaw jyet yol tuʼn tok tuj kywiʼ kʼwal. Jaku bʼant tuʼn tkubʼ kyuʼjin nim kʼwal kyjunalx. Kʼelel kynikʼ manbʼaj qa chi tzalajel kykʼwal kyiʼj txʼolbʼabʼil aj tjaw kyẍchʼiʼn nim maj kywitz. Ax ikx at nim tbʼanel tiʼchaq kye kuʼxin ex kye tiʼj xjal toj uʼj lu.

Aj tpon bʼaj junjun txʼolbʼabʼil at junjun taqikʼ Tyol Dios tkuʼx t-xe t-xaq uʼj. Qajbʼile tuʼn kykuʼx tuʼjine aqeju tqikʼ Tyol Dios atz jaʼ ẍi jatza qe txʼolbʼabʼil lu. Aj tkubʼ bʼaj jun txʼolbʼabʼil tuʼna, ax ikx bʼaʼn tuʼn kyjaw t-ẍchʼiʼna xjel ex nanqetza tzaqʼwebʼil te. Aqeju xjel lu atz ateʼ tiʼjxi txʼolbʼabʼel 116.