MIZIMBU ili mu livulu lino yapua ya vusunga. Va i fumisa mu Mbimbiliya livulu lia seho ya kama mu mavu ose. Mizimbu yaco i lombolola fume ha tangelele Njambi mavu na ku ntsimbu ino. Ya handeka naua ha viuma via na kulahesa Njambi ku ka panga ku lutue.

Lino livulu li hasa ku kuasa ku tantekeya vi ya handeka Mbimbiliya. Lia handeka ha vantu va mu Mbimbiliya na viuma vi va lingile. Kaha ya muesa naua lulavelelo lua kulahesa Njambi ku vantu, lua muono ka ue ku hua mu citungu ha mavu.

Muno mu livulu mua kala mizimbu ya ku pua 116. Mizimbu yaco va i tepa mu mitamba itanu na itatu. Ha mutamba na mutamba, lifo lia katete lia lombolola mu vuihi mizimbu ili mu mutamba uaco. Mizimbu yaco va na i hake mu ku likavasiana ngue muze mu ya solokelelemo. Linga mu tantekeye ha ntsimbu ika via lingikile kuli-ya na viuma vieka via lingikile ku ntsimbu yaco.

Mizimbu ino va i lombolola mu cifua ca casi ku ivuisisa. Va vengi, ha kati kenu vanike mu hasa ku litandelayo enu vavene. Enu visemi mu ka mona nguenu vanike va ka mi lomba linga mu ka va tandele mizimbu yaco ntsimbu yose. Mu ka mona naua nguenu lino livulu li li na viuma vi va lema vanike na vakuluntu.

Ku ntsina ya nkala Muzimbu, kuli mikanda ya mu Mbimbiliya. Tua mi lania nguetu tandenu mikanda, mu va na fumisa mizimbu yaco. Mu nima ya ku tanda nkala muzimbu hitulukenu vihula via putukila ku tsongo ya Muzimbu 116.