Noamox historias tlen uajlauej ipan Biblia

YEJUIN amoxtli technojnotsa itech tlen melauak opanok. Onokixti ipan se amoxtli tlen xonka okse ijkon, itoka Biblia. Ipan yejuin historias ijkuiliujtok, ijkuak toTajtsin opeuj tlachijchiua niman ontlami ipan yejuin tonaltin. Noijki noijtoua tlenon toTajtsin kichiuas ika tlayekapan.

Yejuin amoxtli mitsijlia san seki tlemach itech nochi tlen ipan Biblia ijkuiliujtok. Mitsnojnotsa itech tlen okichiujkej tlaltikpakchanejkej tlen nesij ipan Biblia. Noijki teititia tlenon melak kualtsin toTajtsin kichiuas inpampa tlaltikpakchanejkej, akin nemiskej nochipa ipan tlaltikpaktli, ijkuak yes se xochitlalpan.

Yejuin amoxtli kipiya 116 historias. Xexeliujtokej ipan chikueyi partes. Ipan nochi partes uajlauj se página kampa kijtoua san ika achijtsitsintin tlajtoltin itech tlen ompa technojnotsas. Nochi historias onotlalijkej ijkon ken ouajpanotia nochi tlemach. Yejuin mitspaleuis xkasikamati kemanon onochiuj nochi yejuin.

Ipan yejuin historias notekitiltiaj tlajtoltin tlen uelis tikasikamatis. Miyekej kokonej inselti uelis kipouaskej. Tajtin kitaskej ika inkoneuan melak kuelitaskej makinpouilikan miyekpa yejuin historias. Yejuin amoxtli kipiya miyek tlemach tlen melak kinpaleuis telpokamej niman akin yeuejueyimej.

Kampa ontlami historias uajlauej textos tlen nokixtiaj ipan Biblia. Tiknekiskiaj xkinpoua yejuin partes itech Biblia kampa nokixtia yejuin historias. Ijkuak titlamis tikpouas se historia, noijki xkinpoua itlajtoltilisuan tlen uajlauej iyekapan historia 116 niman xyejyeko tikinnankilis.