Ekitabo Kyangye eky’Ebitebyo by’Omu Baibuli

EKI n’ekitabo ky’ebitebyo eby’amazima. Nibiihwa omu Baibuli, ekitabo ekikuru omu nsi yoona. Ebitebyo ebi nibikworeka ebyafaayo by’ensi okwiha obu Ruhanga yaatandika kuhanga okuhitsya omu bunaku obu turimu. Kandi nibitugambira eki Ruhanga arikuraganisa kukora omu biro by’omu maisho.

Ekitabo eki nikikuha ekishushani aha bikwatiraine na Baibuli. Nikigamba aha bantu ab’omu Baibuli n’ebibaakozire. Kandi nikyoreka amatsiko g’amagara agatahwaho omu kibanja kya Ruhanga eky’omu nsi eki yaaraganiise abantu.

Omu kitabo eki harimu ebitebyo 116. Bitebeekanisiibwe omu bicweka munaana. Orupapura orurikubanza omuri buri kicweka nirugambaho omu bigufu aha birikushangwa omu kicweka ekyo. Ebitebyo ebi nibikuratana gye nk’oku byabaireho omu byafaayo. Eki nikikuhwera kwega obu ebi byabaho n’oku birikukwatagana n’ebindi ebyabaireho omu byafaayo.

Ebitebyo nibigambwa omu rurimi orwanguhi. Imwe abaana bato nimwija kubaasa kubyeshomera. Imwe abazaire nimwija kukizoora ngu abaana baanyu abato nibaija kushemererwa mwaguma nimubashomera ebitebyo ebi emirundi mingi. Nimwija kushanga ngu ekitabo eki kirimu bingi ebirikushemeza abato hamwe n’abakuru.

Ebyahandiikirwe byayorekwa aha muheru gwa buri kitebyo. Nimushabwa kushoma ebicweka ebi ebya Baibuli omu ebitebyo birikukomooka. Waaheza kushoma buri kitebyo, shwijuma n’ebibuuzo eby’ekitebyo ekyo ebirikushangwa aha muheru gw’ekitebyo 116 reero oteereho kwijuka eby’okugarukamu byabyo.