BULUKU ɛhye le buluku mɔɔ nuhua edwɛkɛ ne le nɔhalɛ a. Bɛyele bɛvile ewiade ye buluku kpole kpalɛ ne, mɔɔ le Baebolo ne la anu. Edwɛkɛ ne mɔ maa ɛnwu ewiade ne anwo tetedwɛkɛ ɔvi mekɛ mɔɔ Nyamenle bɔle ɔ bo kɛ ɔbɔ ninyɛne la toonwo bakpula ɛnɛ yɛ mekɛ ye. Eza bɔbɔ bɛka mɔɔ Nyamenle ɛbɔ ɛwɔkɛ kɛ ɔbayɛ ye kenlebie la anwo edwɛkɛ.

Buluku ɛhye maa ɛnyia edwɛkɛ mɔɔ Baebolo ne ka la amuala anwo adwenle. Ɔka menli mɔɔ bɛ aluma wɔ Baebolo ne anu nee mɔɔ bɛyɛle la anwo edwɛkɛ. Eza ɔmaa yɛnwu anyelazo kpole mɔɔ le dahuu ngoane wɔ paladaese azɛlɛ zo mɔɔ Nyamenle ɛva ɛmaa menli la.

Ɛzukoalɛdeɛ ngoko 116 a wɔ buluku ne anu a. Bɛhyehyɛ ɛhye mɔ anu ekpunli ekpunli bɛyɛ ye foa mɔtwɛ. Foa biala mukelɛ mɔɔ lumua la ka mɔɔ wɔ zɔhane foa ne anu la anwo edwɛkɛ sikalɛ. Edwɛkɛ ne mɔ doɔdoa zo kɛmɔ bɛzile wɔ tetedwɛkɛ nu la. Ɛhye boa wɔ maa ɛnwu mekɛ mɔɔ edwɛkɛ ne mɔ sisile nee kɛzi bɛfane ninyɛne gyɛne nwo wɔ tetedwɛkɛ nu la.

Bɛha edwɛkɛ ne wɔ aneɛ mɔɔ ɔ bo ɛdelɛ ɛnyɛ se la anu. Ngakula dɔɔnwo angomekye bahola agenga. Awovolɛ banwu ye kɛ bɛ mra ngakula anye balie kɛ bɛkɛgenga edwɛkɛ ɛhye mɔ bɛkɛhile bɛ fane dɔɔnwo. Ɛbanwu ye kɛ edwɛkɛ mɔɔ maa mgbanyinli nee ngakula amuala anye die la a wɔ buluku ɛhye anu a.

Bɛhile Baebolo nu ɛleka mɔɔ bɛvale edwɛkɛ ne la wɔ ɛzukoalɛdeɛ ko biala awieleɛ. Yɛsɛlɛ wɔ kenga Baebolo foa ɛhye mɔ mɔɔ edwɛkɛ ne vi la. Saa ɛkenga ɛzukoalɛdeɛ ko biala ɛwie a, eza neɛnlea ye kpuyia ne mɔ mɔɔ wɔ Ɛzukoalɛdeɛ 116 ne anzi la anu na bɔ mɔdenle kɛ ɛkɛhola biala anloa ye.