DISFALA buk hem garem olketa trufala story. Olketa kam from buk wea winim evri narawan long full world, Bible. Olketa storyim history bilong world from taem wea God start for wakem evri samting kam kasem taem bilong iumi. Olketa storyim tu olketa samting wea God promis for duim long future.

Disfala buk hem helpem iu for minim wanem nao insaed long Bible. Hem story abaotem pipol insaed long Bible and samting wea olketa duim. Hem storyim tu datfala nambawan hope wea God givim long pipol for kasem laef olowe long wanfala paradaes long earth.

Disfala buk garem 116 story. Olketa story hia stap insaed eitfala sekson. Start bilong each sekson garem wanfala page wea story lelebet abaotem wanem nao insaed datfala sekson. Olketa story hia followim order wea olketa happen long history. Diswan helpem iu for lanem taem wea olketa samting long history happen, and hao olketa join witim nara samting wea happen tu.

Olketa story hia isi for minim. Plande long iufala olketa young pikinini bae fit for readim seleva. Iufala dadi and mami bae lukim hao olketa smolfala pikinini bilong iufala bae laekem tumas for iufala readim olketa story hia long olketa evritaem. Bae iu lukim hao disfala buk storyim staka samting wea olketa young wan and olo bae interest long hem.

Long end bilong each story olketa verse from Bible stap. Hem gud sapos iu readim olketa part bilong Bible hia wea olketa story kam from. Bihaen iu readim finis wanfala story, reviewim tu olketa study kwestin for datfala story wea stap bihaen long Story 116, and trae for tingim olketa ansa.