Biblia yachachisqanmanta librituy

KAY librituqa mana cuentitullachu, ñawpa runap kawsayninmanta willawanchik. Kayqa sumaq libro Bibliamanta urqhukun. Diosninchik ruwayta qallarisqanmantapacha, kunankama imachus kasqanta willawanchik. Chantapis, imatachus Diosninchik astawan qhipaman ruwananmantapis yachachiwanchik.

Kay libroqa unay runamanta, ruwayninmanta ima yachachiwanchik. Astawanpis, imaynatachus qhipaman juk paraisopi kawsananchikta niwanchik.

Kay libropi 116 yachachiykuna kan. Pusaq tantaspi tʼaqasqa kachkan. Sapa tantap qallariyninpi imamantachus yachakunanchikta niwanchik. Kay libroqa, qallariymantapacha kunankama ruwakusqanmanjina willariwanchik. Chaytaq ima tiempopichus imatapis ruwakusqanta yachakuyta yanapasunqa.

Kay willaykunaqa japʼiqayta atinapaqjinalla, chʼuyita. Wawaspis, sapitanku ñawiriyta atinqanku. Tatamamaqa wawitan kay willaykunawan miskʼillichikusqanta rikunqanku. Jatunpis juchʼuypis kay libritupi allin yachachiykuna kasqanta rikunqanku.

Sapa willaypa tukukuyninpi Bibliamanta rimaykuna maskʼanaykipaq rikhurin. Chayta maskʼaspa, Bibliapi runap kawsayninta astawan japʼiqanki. Sapa yachachiyta ñawiriytawan, 116 yachachinap qhipanpi, yachaqanapaq tapuykunata ñawirillaytaq, amataq kutichiykunata qunqaychu.