MBETI so ayeke mbeti so asara tënë ti atâ ye so asi, so ayeke na yâ ti Bible; na Bible ayeke kota ahon tanga ti ambeti kue. A fa aye so asi na yâ mbaï ti dunia, a komanse na ngoi so Nzapa ato nda ti sara aye ti si na ngoi ti e. A sara nga tënë ti aye so Nzapa atene ni yeke sara ande.

Mbeti so afa na mo aye so Bible asara tënë ni. A sara tënë ti azo ti yâ ti Bible na aye so ala sara. A sara nga tënë ti pendere beku ti fini ti lakue lakue na yâ ti Paradis so Nzapa atene ni yeke mû ni ande na azo ti ni.

Mbeti ni ayeke na ambaï 116. A kangbi yâ ti ala na ambage miombe. Lembeti so aga kozo na mbage oko oko asara tënë kete na ndo ti aye so ayeke na yâ ni. A fa atënë ni alingbi na molongo ti aye so asi na yâ ti mbaï. Ye so ayeke mû na mo maboko ti hinga lawa si aye asi na yâ ti mbaï, tongana a haka ni na ambeni ye nde so asi.

Atënë ti yâ ti ambaï ni akpengba pëpe. Mingi ti ala amolenge alingbi ti diko ni ala mveni. Ababâ na mama, ala yeke bâ ande so akete molenge ayeke ye ande ti tene a diko na ala ambaï so lege mingi. Mbeti so ayeke nzere ande na bê ti akete molenge na ti akota zo nga.

A zia aversê na hunzingo ti mbaï oko oko. A hunda na mo ti diko aversê so, so ambaï ni ayeke na yâ ni. Tongana mo hunzi mbeni mbaï awe, kiri mo bâ nga ahundango tënë ndali ti mbaï ni, ahundango tënë so aga na peko ti Mbaï 116. Sara kue ti dabe ti mo na atënë ni.