DISI na wan buku nanga tru tori. Den tori disi komoto na Bijbel, a moro bun buku fu grontapu. Den tori e fruteri fu a historia fu grontapu fu sensi a ten di Gado bigin meki sani te kon miti a ten fu wi. Den e fruteri srefi san Gado pramisi fu du na ini a ten di e kon.

A buku disi e yepi yu fu leri sabi Bijbel. A e fruteri fu sma fu Bijbel èn san den ben du. A e sori tu taki Gado gi libisma a tumusi moi howpu fu têgo libi na ini wan paradijs na grontapu.

A buku abi 116 tori, di tyari kon makandra na ini aiti pisi. Ibri pisi e bigin nanga wan bladzijde di e fruteri syatu san yu o leri na ini a pisi dati. Den tori e kon baka makandra soleki fa den ben pasa na ini a historia. Disi e yepi yu fu sabi o ten wan sani ben pasa na ini a historia te yu teki en gersi nanga tra sani di ben pasa.

Den tori skrifi nanga wortu di makriki fu frustan. Un yonguwan, furu fu unu sa man leisi den gi unsrefi. Unu di de papa nanga mama, sa si taki den moro pikinwan sa feni en wan prisiri sani te unu e leisi den tori disi ala ten baka gi den. Yu sa si taki a buku disi abi furu span tori gi yonguwan nanga owruwan.

Bijbeltekst skrifi na a kaba fu ibri tori. Wi e gi yu deki-ati fu leisi den pisi disi fu Bijbel, di e taki fu den tori. Te yu kaba leisi wan tori, luku den aksi fu a tori dati sosrefi. Den aksi de fu feni baka Tori 116. Luku efu yu sabi a piki na tapu den aksi disi.