LIVRU neʼe kona-ba istória neʼebé loos. Istória sira-neʼe foti husi livru neʼebé diʼak liu iha mundu, Bíblia. Ita sei hatene istória husi tempu neʼebé Maromak hahú kriasaun toʼo ita-nia tempu. No mós, fó-hatene saida mak Maromak promete atu halo iha futuru.

Livru neʼe fó-hatene mai ita saida mak iha Bíblia nia laran. No mós, konta kona-ba ema iha Bíblia, no saida mak sira halo. Livru neʼe mós hatudu esperansa furak neʼebé Maromak fó mai ita atu moris ba nafatin iha Rai paraízu.

Iha livru ida-neʼe nia laran, iha istória 116. Istória hotu fahe ba parte ualu. Pájina primeiru husi parte ida-idak esplika badak kona-ba istória neʼebé iha parte nia laran. Istória hotu konta tuir tempu neʼebé akontese. Nuneʼe, ita sei aprende saida mak mosu uluk no saida mak mosu ikus.

Livru neʼe uza liafuan neʼebé la susar atu komprende. Imi, labarik kiʼikoan sira sei bele lee rasik. Imi inan-aman, imi sei haree imi-nia oan sira neʼebé kiʼik liu mós gosta istória sira-neʼe kuandu imi lee beibeik ba sira. Livru neʼe, iha istória neʼebé furak tebes ba ema klosan no boot hotu.

Istória ida-idak nia rohan iha eskritura sira husi Bíblia. Tanba istória iha livru neʼe foti husi Bíblia, ami anima imi atu lee eskritura sira-neʼe. Bainhira Ita lee hotu istória ida, lee mós pergunta sira ba istória neʼe, neʼebé Ita bele hetan iha pájina ikus sira, no koko atu hanoin-hetan resposta ba pergunta sira-neʼe.