KO E tohi ‘eni ‘o e ngaahi talanoa mo‘oni. ‘Oku to‘o ‘eni mei he tohi lelei taha ‘i he māmaní, ko e Tohitapú. ‘Oku ‘oatu ai kiate koe ‘e he ngaahi talanoá ‘a e hisitōlia ‘o e māmaní talu mei he taimi na‘e kamata ai ‘e he ‘Otuá ‘a e fakatupú ‘o a‘u mai ki hotau ‘ahó ni. ‘Oku nau toe fakahā mai ‘o fekau‘aki mo e ngaahi me‘a ‘oku tala‘ofa ‘e he ‘Otuá te ne fai ‘i he kaha‘ú.

Ko e tohí ni ‘okú ne ‘oatu kiate koe ha fakakaukau fakalūkufua ‘o fekau‘aki mo e Tohitapú. ‘Okú ne fakamatala ‘o kau ki he kakai ‘i he Tohitapú mo e ngaahi me‘a na‘a nau fai. ‘Okú ne toe fakahā foki ‘a e ‘amanaki fakaofo kuo foaki ‘e he ‘Otuá ki he kakaí ‘a ia ko e mo‘ui ta‘engata ‘i he māmani ko ha palataisi.

‘Oku ‘i ai ‘a e ngaahi talanoa ‘e 116 ‘i he tohí ni. ‘Oku fakataha‘i ia ‘i ha ngaahi konga ‘e valu. ‘Oku ‘i ai ‘a e peesi ‘i he kamata‘anga ‘o e konga taki taha ‘okú ne fakamatala nounou ki he me‘a ‘e ma‘u ‘i he konga ko iá. ‘Oku fakahokohoko ‘a e ngaahi talanoá ‘o fakatatau ki he taimi na‘e hoko ai ‘a e ngaahi me‘a ko iá ‘i he hisitōliá. ‘Oku tokoni ‘eni kiate koe ke ke ako ‘o ‘ilo ki he taimi na‘e hoko ai ‘a e ngaahi me‘a ‘i he hisitōliá ‘i he‘enau fekau‘aki mo e ngaahi me‘a kehe.

‘Oku tohi ‘a e ngaahi talanoá ‘i he lea faingofua. Ko e tokolahi ‘o kimoutolu fānaú te mou lava pē ‘o lau. Ko kimoutolu ‘a e ngaahi mātu‘á te mou ‘ilo ‘e fiefia ‘a ho‘omou fānau iiki angé ke toutou lau ange ma‘u pē ‘a e ngaahi talanoa ko ení. Te ke ‘ilo ‘oku ‘i ai ‘a e ngaahi me‘a lahi ‘i he tohí ni ‘oku fakatupu tokanga ki he fānaú tatau pē mo e fa‘ahinga matu‘otu‘á.

‘Oku ‘i ai ‘a e ngaahi konga Tohitapu ‘oku ‘asi ‘i he konga ki mui ‘o e talanoa taki taha. ‘Oku mau fakalototo‘a‘i koe ke ke lau ‘a e ngaahi konga Tohitapú ni ‘a ia ‘oku tefito mei ai ‘a e ngaahi talanoá. ‘I he ‘osi ho‘o fai e talanoá, toe fakamanatu ‘a e ngaahi fehu‘i ako ki he talanoa ko ia ‘oku ma‘u he hili ‘a e Talanoa 116 pea feinga ke manatu‘i ‘a e ngaahi tali.