JA JLIBRO it jun juʼun wa sloʼiltay loʼilik bʼa meran jachʼ ekʼi. Ti elel bʼa Biblia, ja juʼun mas chaʼanyabʼalil yuj chikan jasa. Ja loʼilik yiʼojani wa xcholo sbʼaja jastal kʼe ja jastik junuki man bʼa jtyempotik. Chomajkil wa xyala ja jasa wa skʼapa ja Dyos ja bʼa tyempo jakumto.

Ja juʼun it wa xya naʼ sbʼaja jastik yiʼojan ja Biblia. Wa xyala sbʼaja ixuk winik bʼa tyempo jaw soka ja jastik skʼulaneʼi. Chomajkil wa xyala ja jas skʼapunej ja Dyos sbʼaja ixuk winiki bʼa oj ajyuke sakʼan tolabida bʼa jun tsamal kʼachinubʼ bʼa Luʼum.

Ja juʼuni yiʼojan 116 loʼilik. Tsomubʼal bʼa waxake xetʼan. Bʼa jujune ja xetʼanik jaw ayiʼojan jun bʼajtan slam bʼa wanxa xcholo tʼusan sbʼaja jastik yiʼojani. Ja jastal ni cholubʼal jan ja loʼiliki jachʼni nake ekʼel jana. Ja it oj skoltaya bʼa oja nebʼ jas tyempoʼil ekʼ ja jastik junuki bʼa jujune ja loʼiliki.

Ja loʼiliki cholubʼal bʼa jun modo mi wokoluk yabʼjel stojolil. Jitsan yal untik oj bʼobʼ skʼumuke yeʼn ta stuchʼile. Ja nantataliki ojni yil-e ja yal yuntikileʼi jel oj skʼuluke gusto ja oj skʼumuk yile jitsan ekʼele ja juʼuni. Ojni cha ilxuk ja juʼun it ayiʼojan jitsan jastik junuk bʼa kerem akʼixuk soka matik ayxa skʼujole.

Bʼa xchʼakulabʼil jujune ja loʼiliki ayiʼojan tekstoʼik. Kʼuman yujni ti naka elel bʼa Biblia. Yajni chʼakta akʼumuk june ja bʼa loʼili, kaʼax man bʼa xchʼakulabʼil ja loʼil 116 sok ti tiw wa xtax ja sjobʼjeliki.