UMA libro xla takgalhtawakga xalak Biblia lichuwinan wantuku xaxlikana lanit. Anta takilhtinit klibro nema tlakg xlakaskinka xlikalanka Katiyatni, wa Biblia. Kgatunu kgatunu takgalhtawakga uma xalak Biblia lixakgatliyan wantuku lanit kkakilhtamaku akxni Dios malakatsukinalh asta kkinkilhtamakujkan. Na waniyan tuku Dios wanit nema aku natlaway.

Uma libro maxkiyan aktsu tamakatsin xlakata tuku lichuwinan Biblia. Lixakgatliyan kristianos nema lichuwinan Biblia chu tuku tlawakgolh. Na masiyay nema lu xatlan tuku Dios wanit nakamaxki kristianos pi nikxni katinikgolh akxni Katiyatni xakalipaxaw nawan.

Wi 116 takgalhtawakga xla Biblia unu klibro. Uma libro pulaktsayan tapitsinit. Akxni tsukuy pulakatunu, pulana lichuwinan tsinu tuku natalichuwinan ktama kpulaktu. Kgatunu takgalhtawakga takaxwilinit chuna la tilatilhalh kkilhtamaku. Uma namakgtayayan nakatsiya tukuya kilhtamaku tilalh nema lichuwinan akgtum takgalhtawakga chu tukuya kilhtamaku tilalh amakgapitsin.

Uma takgalhtawakga wa xalak Biblia wi chuna la ni lu tuwa nakatsikan tuku lichuwinamputun. Lhuwa laktsu kaman tlan xakstukan nalikgalhtawakgakgoy. Xanatlatni naʼakxilhkgoy pi xkamankan lu nalipaxuwakgoy makglhuwa nakalikgalhtawakganikan uma takgalhtawakga xalak Biblia. Unu klibro kgalhi lhuwa tuku xlakaskinka xlakata nakamakgtaya laktsu kaman chu tiku laklankata.

Kxkgatsputat kgatunu takgalhtawakga, anta wi niku takilhtinit kBiblia. Lu tlan xwa pi xlikgalhtawakga uma pulakatunu xalak Biblia niku takilhtinit kgatunu takgalhtawakga. Nachuna akxni namakgatsputuya kgatunu takgalhtawakga, katlawa xatakgalhskinin nema wi kxkgatsputat takgalhtawakga 116 xla takgalhtawakga nema aku akxilhti chu kamasta xatakgalhtin.